На денешниот состанок на Министерството за здравство со регионалните власти е договорено и да се зголеми бројот на гледачи на спортските настани
Во Шпанија, каде што бројот на заразени со коронавирус е намален во последните две недели, повеќе нема да биде задолжително носењето заштитни маски на отворено, соопшти денеска шпанското Министерство за здравство.
Министерката за здравство Каролина Даријас, која ја најави оваа мерка во петокот, денеска се состана со претставници на 17-те автономни провинции со кои се согласи да се укине задолжителното носење маски на отворено, кое е во сила од 22 декември. Мерката беше одобрена од сите провинции освен северната Баскија, која беше воздржана за време на гласањето.
Одлуката утре ќе ја потврди шпанската влада, па Шпанците во четврток би можеле да излезат на улица без маски. Носењето, сепак, се препорачува на места каде што се собираат повеќе луѓе и каде што нема доволно простор меѓу нив.
Во Шпанија на 21 јануари имаше рекордни 3 419 заразени на 100 000 жители, но тој број сега падна на 2 300. Намалување на новозаразените лица е забележано во сите автономни провинции, кои сепак сами одлучуваат за некои мерки, како што е барањето ковид-пропусници на влезот во кафулињата и рестораните.
На денешниот состанок е договорено и да се зголеми бројот на гледачи на спортските настани, така што ќе биде дозволено капацитетот да биде исполнет до 85 отсто на отворените стадиони како што се фудбалските, а во затворените простори, каде што се игра кошарка, дозволениот капацитет на трибините ќе биде 75 проценти.
Во Шпанија, од почетокот на пандемијата се заразија 10,2 милиони луѓе од вкупно население од 47 милиони жители.