Прекурсорот бил набавен од страна на македонски државјани од лица од Кина, кој преку Турција пристигнал во Северна Македонија, со крајна дестинација во земји на Европската унија, со цел понатамошно производство на синтетичка дрога амфетамин и метамфетамин, соопшти министерот за внатрешни работи Оливер Спасовски, а првичната проценка е дека од набавената количина на прекурсорот требало да биде произведен амфетамин во вредност од над 50 милиони евра
Во полициска акција денеска на скопскиот аеродром беа запленети над еден тон прекурсори, а првичната проценка е дека од набавената количина на прекурсорот требало да биде произведен амфетамин со вредност од над 50 милиони евра.
Во полициската акција од слобода се лишени две лица како дел од меѓународна организирана криминална група за кои постои основано сомнение дека сториле кривично дело неовластено производство и пуштање во промет на наркотични дроги, психотропни супстанции и прекурсори.
„Прекурсорот бил набавен од страна на македонски државјани од лица од Кина, кој преку Турција пристигнал во Северна Македонија, со крајна дестинација во земји на Европската унија, со цел понатамошно производство на синтетичка дрога амфетамин и метамфетамин“,
соопшти министерот за внатрешни работи, Оливер Спасовски.
Од Јавно обвинителство појаснија дека во спроведената акција се запленети 40 пакувања хемиска материја во вкупна тежина од 1105 килограми.
Оттаму информираат дека во текот на денешниот ден приведените лица ќе бидат изведени пред судија на претходна постапка при Основниот кривичен суд – Скопје и за истите е предложено изрекување на мерка притвор.
Во меѓународната акција учествувале полициски службеници од Одделот за сузбивање на организиран и сериозен криминал во соработка со Јавното обвинителство за гонење на организиран криминал и корупција, Јавното обвинителство на Турција, Царинските служби на Турција и Северна Македонија како и СЕЛЕК (Центарот за спроведување на законите во Југоисточна Европа), соопшти министерот Оливер Спасовски.