Битолчанецот што им се закани на Јовески и Русковска лани на ист начин се заканил и дека ќе го убие помошник-државниот секретар на САД, Ескобар

Писмото го адресирал до Амбасадата на САД во Скопје и истиот ден го испратил по редовна пошта преку поштата во Прилеп

Од Основното јавно обвинителство Прилеп до судијата на претходна постапка во Основниот суд во Прилеп се бара определување мерка притвор за осомничениот поради опасност од бегство и можност да го повтори делото

Основното јавно обвинителство Прилеп отвора истражна постапка против 56-годишниот битолчанец, осомничен за кривично дело – загрозување лица под меѓународна заштита од член 420 став 4 во врска со став 1 и две кривични дела – загрозување на сигурноста од член 144 став 3 во врска со став 2 и став 1 од Кривичниот законик.

Во соопштението Обвинителството истакнува дека истото лице на 11.12.2021 година, во рачно напишано писмо на англиски јазик, се заканило дека ќе го убие Габриел Ескобар, помошник-државниот секретар на САД и специјален претставник за Западен Балкан, како и други американски дипломати.

Писмото го адресирал до Амбасадата на САД во Скопје и истиот ден го испратил по редовна пошта преку Пошта во Прилеп.

Претходно, МВР соопшти дека тој во периодот од 20.12.2021 до 22.12.2021 година, во два наврата, преку рачно напишани писма на англиски јазик, упатил сериозна закана дека ќе нападне врз животот и телото на службено лице во вршењето на службата и ја загрозил сигурноста на обвинителката Вилма Русковска, а двете писма ги испратил по редовна пошта од Прилеп – првото го адресирал до Јавното обвинителство на Република Северна Македонија, а второто до Основното јавно обвинителство за гонење организиран криминал и корупција.

На 17.1.2022 година осомничениот упатил сериозна закана дека ќе нападне врз животот и телото на службено лице во вршењето на службата и ја загрозил сигурноста на државниот јавен обвинител Љубомир Јовески, во писмо адресирано лично до него и испратено преку редовна пошта од Битола.

МВР: 56-годишен битолчанец стои зад заканите по живот до Јовески и Русковска – графолошкото вештачење покажало совпаѓање на ракописот

Од Основното јавно обвинителство Прилеп до судијата на претходна постапка во Основниот суд во Прилеп се бара определување мерка притвор за осомничениот поради опасност од бегство и можност да го повтори делото.