Со оглед дека сè уште има маркети кои делат бесплатно кеси или користат пластични кеси, но само без рачки, министерот најави почести контроли од Пазарниот инспекторат во наредниот период. Нуредини нагласи дека не е дозволена употреба на пластични кеси подебели од 15 микрони за носење стоки без разлика дали се со рачки или без и додаде дека таквите кеси мора да се плаќаат по 15 денари
Откако од 1 декември 2021 стапи на сила забраната за користење на пластични кеси за носење стоки, а се дозволи употреба само на биоразградливи кеси, но со надоместок од 15 денари, има големо намалување во нивната потрошувачка. Во некои маркети кои порано бесплатно давале кеси има намалување и до десет пати, а кај оние кај кои се плаќаше по денари или два, продажбата на кеси е намалена четири пати, објави денеска министерот за животна средина Насер Нуредини.
Од продажбата на кеси, која сега се врши по 15 денари, пак, само во декември собрани се 234 000 евра.
„Поминаа речиси два месеци од воведувањето на забраната. Во првиот месец – декември 2021 година од продажбата на биоразградливи кеси се собрани 14 413 019 денари (234 000 евра). Според анализите кои ги започнавме да ги правиме во соработка со маркетите може да се заклучи дека имаме големо намалување на потрошувачката на кеси“,
рече Нуредини на денешната средба со новинарите.
За наредниот период тој најави дека овие пари ќе бидат распоредени за проекти, а идејата е да се искористат за набавка на контејнери за селектирање на отпад, пред сè на пластика и конзерви, за што се бара поддршка и од локалната самоуправа и колективните постапувачи за селекција на отпад.
Со оглед дека сè уште има маркети кои делат бесплатно кеси или користат пластични кеси, но само без рачки, министерот најави почести контроли од Пазарниот инспекторат во наредниот период. Тој нагласи дека не е дозволена употреба на пластични кеси подебели од 15 микрони за носење стоки без разлика дали се со рачки или без и додаде дека таквите кеси мора да се плаќаат по 15 денари. Кесите потенки од 15 микрони, посочи Нуредини, се за хигиенска употреба и може да се користат за пакување месо за што маркетите плаќаат.
„Во контакт сме со Пазарниот инспекторат за да има построги контроли за имплементирање на законите. Контролите ќе ги започнеме во поголемите маркети, бидејќи тие се и најголеми потрошувачи на кеси. Еден голем маркет лани во ноември пред воведувањето на забраната бесплатно делел по 800 илјади кеси, а по воведувањето во декември продал 103 илјади. Друг голем маркет во кој се плаќале кесите месечно продавал по 709 илјади, а сега продава само 147 илјади кеси по 15 денари“,
рече министерот.
Фото: МИА