Премиерот во заминување Зоран Заев и министерот за здравство Венко Филипче, на директорите и менаџерските тимови на клиниките од јавното здравство кои најнепосредно беа вклучени во борбата со пандемијата од ковид-19, денеска им ги предадоа плакетите што ќе им бидат врачени на 8 500 здравствени работници во земјата за нивното пресудно и исклучително важно учество справувањето со последиците од вирусот и епидемијата.
На настанот на кој започна со едноминутно молчење во спомен на починатите од ковид-19, премиерот Заев истакна дека биле преземени соодветни и ефикасни мерки за да се запре фаталната природа и непредвидливоста на вирусот, да се намалат ризиците и да се пружи соодветна терапија и медицинска нега на заболените.
„Заедно со министерот Филипче и со останатите во тимовите непосредно задолжени за справување со пандемијата, како и со сите вработени во здравството кои несебично се ставија целосно на располагање со сите свои капацитети на првата линија, создававме соодветни мерки за да обезбедиме сигурност за секој граѓанин поединечно, како и за општеството во целост. Благодарение на навремените мерки и одлуки, македонскиот здравствен систем во текот на целата ковид криза функционира без застој. Најважна и пресудна улога за тоа остварување имавте вие – здравствените работници“,
кажа Заев.
Премиерот додаде дека со помош на пожртвуваноста и посветеноста на здравствените работници беше реорганизирано раководењето со државата со единствена цел – да се стават сите ресурси во заштита на здравјето на сите на наши граѓани. Како континуитет на овие политики, истакна Заев, во Буџетот за 2022 година здравството и здравјето на граѓаните е приоритет. Во завршницата на своето обраќање Заев изрази убеденост дека ќе продолжат политиките за максимална здравствена заштита и нега со обезбедување на модерно здравство.
„Признанијата што денеска ќе ви бидат предадени за да им ги поделите на вработените, Владата ги доделува во име на народот и во име на благодарноста за тоа што вие и вашите колеги останавте до крај посветени и дадовте сè од себе за да го спасите, зачувате и подобрите здравјето на нашите пациенти. Огромен товар падна на вашиот грб и ја заслужувате најголемата почит и благодарност за хуманоста, грижата и пожртвуваноста. Во оваа борба со ковид-19 вие сте хероите“,
кажа Заев.
- ПОВРЗАНА ВЕСТ: (ВИДЕО) Да нема болни, а „белите мантили“ да добијат економска сатисфакција – персоналот на Инфективна се надева на помирна 2022 година
Министерот за здравство Венко Филипче нагласи дека иако медицинскиот кадар целосно се посвети на борбата со пандемијата во континуитет се вршеле сите итни прегледи и интервенции, а лекови и терапија обезбедуваме во континуитет за сите пациенти.
„Секој ден не ни беше борба само со корона, туку и организација на здравствениот систем, секојдневни контакти со колегите, консултации за пациенти, долги состаноци за координација, тешки одлуки и лични судбини кои секогаш допираат.. И потоа повторно нов ден пред нас…“,
кажа Филипче.
Тој додаде дека сите здравствени работници покажаа високо ниво на професионалност, сплотеност и колегијалност и во ниту еден момент не потклекнаа под притисокот.
„Часови поминати во скафандери, секојдневно соочување и со болеста, и со смртта. Здравствените работници не се прашуваа дали сакаат да работат во ковид, дали се самохрани родители на малолетно дете, дали имаат ризик во семејството, дали ги загрозуваат своите најблиски со тоа што секојдневно се во допир со болеста. Вие, не знаевте за одмор, за оддишка, за викенд, слободен ден со семејството, пријателите, вие почитувани колеги знаевте само за едно, и бевте насочени само кон едно – лекување на пациентите. Светската пандемија наметна ново темпо на работа, а во неа здравствените работници немаат работно време“,
истакна министерот Филипче.
На настанот во име на здравствените работници се обрати и Александра Георгиева, специјализант на Клиниката за кардиологија, којашто упати апел до граѓаните да се вакцинираат со што ќе им оддадат благодарност на најдобар начин на здравствените работници.
Од името на сите здравствени работници на оваа пригодна церемонија на премиерот Заев му беше врачена уметничка слика од авторот Мерсад Бербер како благодарност за неговата поддршка на здравствените работници и јавното здравство во битката со пандемијата.
