Вчера, Советот за општи работи на ЕУ ги усвои заклучоците во кои се вели дека со нетрпение се очекува да се одржат првите меѓувладини конференции со Република Северна Македонија и Албанија што е можно поскоро, откако ќе бидат одобрени преговарачките рамки
Не гледам основа и нови факти кои би ја промениле бугарската позиција кон Република Северна Македонија, изјави денеска потпретседателката на Бугарија, Илијана Јотова.
Според неа, најважно е да се изготви патоказ што да се прави отсега натаму на билатерален план.
Бугарија, додава Јотова, ќе ја чека одлуката на Република Северна Македонија, бидејќи нејзиниот премиер поднесе оставка, и ќе се разгледаат новите предлози од европските партнери. Сепак, според неа, тоа нема да понуди ништо ново.
Покрај од Јотова, изјава дека нема промена на бугарските позиции за земјава денеска стигнаа и од заменик-претседателот на Народното собранието, Кристијан Вигенин.
Пред новинарите во парламентот тој рече дека позицијата не е променета и оти вчера бугарското МНР ја потврдило таа позиција на Советот за општи работи на ЕУ.
Таа позиција се наоѓа и во коалицискиот договор. Таму исто така е запишано дека се поддржува широк консензус во Бугарија по тоа прашање, коментира Вигенин.
Вигенин им препорача на новинарите да ги видат и оригиналните текстови на интервјуата алудирајќи на интервјуто на премиерот Кирил Петков за „Фајненшел тајмс“, којшто весник констатираше дека новиот премиер дава сигнали за крај на опструкциите за почеток на преговорите на Северна Македонија со ЕУ.
„Начинот на кој е цитирано интервјуто во бугарските медиуми, не е тоа што се наоѓа во оригиналниот текст. Одново истакнувам – бугарската позиција останува единствена, таа е истата што е потврдена со одлуката на Народното собрание. Во нашиот договор пишува дека таа позиција останува и ќе биде надградена со идеи за нови заеднички комисии, за соработка во одделни области“,
рече Вигенин.
За формирање нови комисии вчера зборуваше и Петков по седница на бугарската влада.
„Вчера добив повик од Зоран Заев да ми ја честита функцијата. Ја разгледавме идејата за работни групи за која разговаравме во текот на кампањата. Тие ќе се структурираат што е можно поскоро, и се надевам на почетокот на јануари дека ќе имаме јасен план кои ќе бидат тие групи. Вклучувајќи го и она за што разговаравме утрово – да вклучиме повеќе култура, инфраструктура и економија како надополнување покрај историјата. Треба да направиме акциски план и на почетокот на јануари овие работни групи да имаат реални резултати, да дадат идеја да ги унапредиме преговорите на пооперативен план“, изјави
вчера Петков.
Извесно е дека на Самитот на ЕУ во Брисел нема да има деблокада на преговорите за Северна Македонија. Вчера, Советот за општи работи на ЕУ ги усвои заклучоците во кои се вели дека со нетрпение се очекува да се одржат првите меѓувладини конференции со Република Северна Македонија и Албанија што е можно поскоро откако ќе бидат одобрени преговарачките рамки.