Српскиот претседател најави набавка на 30 хеликоптери во наредните две години
Претседателот на Србија, Александар Вучиќ, денеска најави дека земјата во 2022 и 2023 година ќе набави уште околу 30 хеликоптери и дека ќе биде хеликоптерска велесила во регионот, јави МИА од Белград.
„Голем број хеликоптери се набавени годинава и претходните години, а очекувам големи набавки следната година и во 2023 година. Очекуваме уште вкупно 18 плус 12 хеликоптери. Значи, ние ќе бидеме, ако можам така да кажам, хеликоптерска велесила во овој регион“,
изјави Вучиќ по демонстрацијата на хеликоптерски единици на Воздухопловните сили и ПВО и 63-та падобранска бригада во Ниш.
Тој денеска пред новинарите изјави дека на средбата со компаниите од одбранбената индустрија на Србија е донесена одлука за помош на домашната наменска индустрија со 145 милиони евра во првиот квартал од 2022 година.
Како што рече, донесена одлука и дека Србија во следните пет години ќе нарача опрема, оружје и орудија, возила и муниција, мини, ракети од домашната наменска индустрија во вредност од 1,25 милијарди евра.
Вучиќ истакна дека со зголемувањето на платите на припадниците на војската е запрен одливот на луѓе од армијата на Србија.