Шефот на дипломатијата вели дека во 2019 г. двете земји беа во обратна позиција, кога ние требаше да се движиме, а Албанија немаше поддршка од неколку земји членки. Смета дека е во интерес на двете држави да се држат заедно
Шефот на дипломатијата Бујар Османи не очекува да се случи раздвојување на Албанија и Северна Македонија на европскиот самит во декември на кој повторно ќе се разгледува дали двете земји ќе почнат преговори со Европската Унија.
„Се надевам дека сериозно ќе се разгледаат последиците од ова одложување, од ова неефектуирање на сопствените одлуки од страна на ЕУ, што значително ќе влијае на довербата на самата Унија во регионот и ќе доведе до ситуација и двете држави да почнат најдоцна во јануари со преговорите“,
рече Османи во разговор за „Топ тема“ на Телма.
Тој посочи дека во 2019 година двете земји беа во обратна позиција кога ние требаше да се движиме, а Албанија немаше поддршка од неколку земји членки и тогаш беше прашањето дали да се издвои Северна Македонија. Смета дека е во интерес на двете држави да се држат заедно, бидејќи создаваат синергија и даваат една регионална динамика, една регионална компонента на процесот дека ова не е само демократски процес туку и политички процес.
За тоа дали има француска иницијатива за надминување на спорот со Бугарија, Османи вели дека тоа било извадено од контекст од изјавата на вицепремиерот Артан Груби, но оти во последно време е видлива една француска проактивност во изнаоѓање на решение.
„Тоа е добро за европската перспектива на регионот, имајќи ја предвид тежината на Франција во ЕУ. Навистина тоа го гледавме кога го посетивме претседателот Макрон во Елисејската палата, меѓутоа и низ сите мои средби. Јас го сретнав и францускиот колега Ле Дријан и навистина се гледа една проактивност на Франција, а имајќи ја тука предвид и проактивноста на Германија која е константна и силна. Кога двете најсилни држави на ЕУ покажуваат таква проактивност се разбира дека дава надеж на целиот регион дека сепак овој процес има иднина“,
рече Османи.
Осврнувајќи се на приоритетите на претстојното француското претседателство со Советот на ЕУ, кои вчера ги претстави претседателот Емануел Макрон, шефот на дипломатијата рече дека сепак е добро што тој го издвоил делот за Западниот Балкан и неговото значење за ЕУ како географски, историски, културолошки, економски дел од Европа, кој еден ден мора да биде дел од Унијата.
„Сите што го следат процесот знаат дека ЕУ со регион надвор од неа, ниту може да биде геополитички фактор во светот, ниту стабилна и просперитетна“,
вели Османи.
Запрашан за тоа дека Бугарија веќе го потврди своето вето за старт на преговорите со одлуката за неменување на позициите во однос на Северна Македонија на декемврискиот Совет за општи работи, Османи рече дека тоа е став на техничката Влада во Софија.
„Во преговорите има и одредени тактички позиционирања, со цел да се изгради подобра позиција за секоја од страните. Јас повеќе го сакам пристапот на доверба и отворен и транспарентен разговор отколку на тактички позиционирања. Ние сме сепак најблиски соседи и треба да живееме заедно“,
вели Османи.