Никарагва ја призна политиката на кинеската комунистичка партија „Една Кина“
Никарагва ги прекина долгогодишните дипломатски односи со Тајван и ја призна политиката на кинеската комунистичка партија „Една Кина“.
„Владата на Република Никарагва денеска ги прекинува дипломатските односи со Тајван и престанува да има какви било контакти или официјални односи. Народна Република Кина е единствената легитимна влада што ја претставува цела Кина, а Тајван е неотуѓив дел од кинеската територија“,
се вели во соопштението на тамошното МНР.
Тајван брзо реагираше и изрази жалење поради оваа одлука. Потегот на Никарагва, пак, го остава Тајван со само 14 формални дипломатски сојузници, главно во Латинска Америка и Карибите, заедно со неколку мали држави.
Раскинувањето на односите со Тајван е удар и за САД, по неколкумесечните влошени односи меѓу претседателот на Никарагва, Даниел Ортега и Вашингтон, а дојде на ден кога американскиот Стејт департмент соопшти дека вовел санкции за советникот за национална безбедност на Ортега.
Минатиот месец американскиот претседател Џо Бајден го критикуваше претседателот Ортега, при што претседателските избори во Никарагва ги нарече „пантомима“ затоа што поранешниот марксистички герилец и противник на САД од Студената војна победи на изборите и го освои четвртиот мандат по ред.