Бројот на оздравени, пак, во периодот од 29 ноември до 5 декември изнесува 2 540
Во периодот од 29 ноември до 5 декември направени се 16 948 тестови за ковид-19, а регистрирани се 2 275 нови позитивни случаи од 35 градови во државата. Во споредба со една недела претходно, бројот на тестирања е намален за 9,8 отсто, а на новозаразени е намален за 17,3 отсто, покажува извештајот на Институтот за јавно здравје (ИЈЗ).
Процентот на позитивни случаи од вкупниот број на тестирани се движи од 7,8 до 19 отсто или во просек 13,1 отсто.
Најголем дел од регистрираните случаи се од Скопје односно 43,9 отсто.
Заболените се од сите возрасни групи, а најзастапена е таа над 60 години – 22,9 отсто. Најмал број заразени од новите случаи се кај децата на возраст од девет години – четири отсто.
Од вкупниот број на заразени, 40 граѓани се заразни по втор пат односно станува збор за реинфекција.
Бројот на оздравени, пак, во периодот од 29 ноември до 5 декември изнесува 2 540.
Истиот период регистрирани се 68 смртни случаи во 18 градови што е намалување за 30,6 отсто во однос на една недела претходно. Најголем дел од починатите – 27, биле од Скопје. Во однос на возраста, пак, 79,4 отсто од смртните случаи биле над 60 години.