Секогаш велам дека не сакам да ги подигаме очекувањата за да не ги фрустрираме граѓаните, но и тие треба да не сфатат дека тоа ни е инструмент за да ја продолжиме тензијата. Ако јас се откажам уште од сега за декември, ние ќе почнеме да планираме веќе друг датум и ќе се разводни фокусот, вели министерот за надворешни работи
Не сакаме да ги подигаме очекувањата за одржување на првата Меѓувладина конференција (МВК) со Европската Унија, но инстистирањата на 14 декември да се одржи првата МВК е наш инструмент за притисок кон земјите членки, вели шефот на дипломатијата, Бујар Османи, во гостувањето во емисијата на „360 степени“ на ТВ Алсат.
„Доколку и ние го повлечеме притисокот дека на 14, 15, 16 декември треба да се одржи Меѓувладината конференција, кој треба да го направи тој притисок? Ние правиме таков притисок и во ЕУ и врз земјите членки дека се претера со одложувањето, земјата ги има исполнето условите и нема причина зошто да не се одржи првата МВК. Ние ги разбираме граѓаните и јас секогаш велам дека не сакам да ги подигаме очекувањата за да не ги фрустрираме граѓаните, но и тие треба да не сфатат дека тоа ни е инструмент за да ја продолжиме тензијата. Ако јас се откажам уште од сега за декември, ние ќе почнеме да планираме веќе друг датум и ќе се разводни фокусот. Сакаме да го држиме фокусот“,
порача Османи.