За разлика од Даштевски, кој вели дека има мал број случаи каде се појавиле проблеми, дел од медиумите јавуваат за повеќе избирачки места во различни општини каде не може да се оствари правото на глас со помош на уредите за за биометриска идентификација
ДИК испратила допис до општинските изборни комии со кој ги известува дека „доколку гласачот неспорно е идентификуван во избирачкиот список, а уредот за биометриска идентификација не го препознава и по неколку обиди, на гласачот му се дозволува да гласа со оставање на отисок од прст во изводот на избирачкиот список во графата за отисок на прст“
Во дел од избирачките места има проблеми со уредите за биометриска идентификација на гласачите, потврди првиот човек на Државната изборна комисија, Александар Даштевски. На прес-конференција во седиштето на ДИК, Даштевски рече дека станува збор за мал број случаи на проблеми со ракувањето на уредите, кои на терен се решаваат со помош на ИТ-експерти.
„Во одредени избирачки места се појавија потешкотии околу ракувањето со уредите. Дел од нив се веќе надминати, а дел тековно се отстрануваат со помош на техничките лица на самите избирачки места. Станува збор за мал процент, се решаваат во континуитет. Секако, важи она правило од законот дека доколку е прекинато гласањето, продолжува за онолку време колку што е прекинато, според Изборниот законик, но не повеќе од 3 часа“,
рече Даштевски.
Даштевски информираше дека ДИК испратила допис до општинските изборни комии со кој ги известува дека „доколку гласачот неспорно е идентификуван во избирачкиот список, а уредот за биометриска идентификација не го препознава и по неколку обиди, на гласачот му се дозволува да гласа со оставање на отисок од прст во изводот на избирачкиот список во графата за отисок на прст“.
Во маилот се напоменува дека стариот начин на гласање – со употреба на спреј и УВ лампа, се применува само во случај кога уредот за биометриска идентификација на гласачите е неупотреблив или нема можност за негова замена.
За разлика од Даштевски, кој вели дека има мал број случаи каде се појавиле проблеми, дел од медиумите од утрото јавуваат за повеќе избирачки места во различни општини каде не можело да се гласа поради проблеми со уредите за отпечатоци.
Во Гостивар – проблемот најизразен?
Од ОИК Гостивар информираа дека повеќе од половината апарати кои ги отчитуваат отпечатоците од прст не можеле да се активираат, а со УВ-ламба и со спреј се гласало и на избирачки места во Прилеп, Скопје, Штип…
Даштевски вели дека поголем број на проблеми се јавиле во раните утрински часови, поради тоа што „некои луѓе“ не знаеле да ракуваат со уредите.
„Сабајле имаше повеќе проблеми, бидејќи некои луѓе не знаеја да ракуваат со уредите. Како што одат ИТ-лицата, се смалуваат проблемите. Техничките проблеми се надминуваат“,
вели Даштевски.
Инаку, според податоците на сајтот на ДИК, до 9 часто над три отсто од граѓаните го искористиле правото на глас.