За разлика од пониското Обвинителство за организиран криминал, кое барало затвор за сите условно осудени со првостепената пресуда и повисоки казни за сите што добијат затворски, Вишото смета дека дел од затворските казни се прифатливи, а се согласува со жалбите за условните и за затворските казни кои се под законскиот минимум
Вишото јавно обвинителство бара дел од обвинетите во случајот „Транспортер“, осудени со првостепена пресуда, да добијат повисоки затворски казни, како и затворски наместо условни казни. Исто така, смета дека и конфискацијата на имот од една од фирмите треба да се зголеми од 695 611 денари (околу 11 300 евра) на 857 637 (речиси 14 000 евра).
„Транспортер“ се однесува на злоупотреба на службената положба во врска со организирањето превоз на ученици во Битола и со првостепената пресуда поранешниот битолски градоначалник доби осум години затвор. Уште десет други лица во овој предмет се осудени со затворски, а десет со условни казни. Првостепената одлука од Основниот кривичен суд во Скопје беше донесена на 30 март лани, а сега се наоѓа пред Апелација, до каде во врска со жалбите свое мислење испратило и Вишото обвинителство.
Во своето мислење, ова обвинителство бара да се одбијат жалбите на одбраната, додека за оние поднесени од пониското обвинителство (Обвинителството за гонење организиран криминал и корупција) наведува дека се согласува делумно.
Конкретно, Вишото се согласува со Обвинителството за гонење организиран криминал дека конфискацијата од еден од превозниците треба да биде поголема за околу 3 000 евра.
За разлика од пониското обвинителство, кое барало затвор за сите условно осудени со првостепената пресуда и повисоки казни за сите што добијат затворски, Вишото смета дека дел од затворските казни се прифатливи, а се согласува со жалбите за условните и за затворските казни кои се под законскиот минимум.
„Вишото јавно обвинителство Скопје по целосно разгледување на предметот делумно ја уважи жалбата на Основното јавно обвинителство за гонење на организиран криминал и корупција. Повисокото обвинителство ја прифати жалбата во делот на обвинети кои се осудени како соизвршители, со оглед на тоа што без нивните дејствија не би можело да се исполнат обележјата на кривичното дело што им се става на товар на обвинетите, ниту пак превозниците би прибавиле противправна имотна корист. Жалбата е прифатена и во делот изречената казна под законскиот минимум за дел од превозниците“,
велат од Обвинителството.
За жалбите на обвинителството и на одбраната во врска со пресудата донесена лани во март треба да се изјасни Апелацискиот суд во Скопје. Тој може во целост да ја потврди пресудата од Основниот кривичен суд, да ја преиначи или да ја укине и да го врати предметот на повторно судење.