Според членот 15 од Статутот на СДСМ, независна кандидатура на избори е една од причините за исклучување од партијата. Но, Статутот предвидува постапка за исклучување, додека крајната одлука ја носи ЦО, во ситуации кога членот што се исклучува е партиски функционер или носител на функција на централно или на локално ниво
Централниот одбор на СДСМ, на првата наредна седница, треба само да констатира дека досегашниот градоначалник на Куманово, Максим Димитриевски, го прекршил партискиот Статут, официјализирајќи независна кандидатура за претстојните локални избори, што повлекува негово исклучување од партијата, објасни денеска лидерот на социјалдемократите Зоран Заев.
„Самиот Статут на СДСМ, водејќи се од сите демократски определби, направил јасна дистинкција. Кога ќе одлучите дека треба да го напуштите СДСМ, опишано е на неколку начини како се прави тоа. Еден од тие начини е токму тоа. Истапувате од СДСМ и одите како независен кандидат. Максим Димитриевски се одлучи за тоа, тоа е негова одлука. На првиот Централен одбор СДСМ треба да го констатира тоа што Максим го направи, односно тоа е исклучувањето од СДСМ. Тоа е јасно определено. Тоа го знае и Максим. Тој е делегат на конгрес“,
рече Заев.
Според членот 15 од Статутот на СДСМ, независна кандидатура на избори е една од причините за исклучување од партијата. Од друга страна, Статутот предвидува постапка за исклучување, додека крајната одлука ја носи Централниот одбор на партијата во ситуации кога членот кој се исклучува е партиски функционер или носител на функција на централно или на локално ниво.
Заев посочи дека СДСМ 30 години победува во Куманово.
„Кога ќе тргнете против СДСМ, не можете истовремено да бидете и член на СДСМ, а можете слободно да ги кажете вашите различности, да дојдете во органите и телата на партијата, да дискутирате, да се борите за вашите ставови. Најдоброто во СДСМ е што различните ставови многу често и победуваат, дури и кога не се ставови на највисокото раководство. Максим беше член на конгрес, по функција член на ЦО како градоначалник, секогаш го имал правото да дискутира, да дојде и да ги каже своите забелешки. И овде ја знае јасно процедурата. Неговата определба да не дочека СДСМ да ја донесе одлуката и преурането да го напушти процесот на селекција на кандидатите е негова лична одлука и со неа тој ја донесе и одлуката за себеисклучување од СДСМ“,
рече Заев.
Тој зборуваше и за внатрепартиските превирања во Радовиш, каде што СДСМ излезе со друг кандидат, односно не го кандидира повторно досегашниот градоначалник Герасим Конзулов.
„Јас го разбирам тоа, уставно е загарантирано изразувањето на незадоволство и каков било протест. Ние водиме грижа за изразот на незадоволството и се обидуваме на сите да им објасните зошто така сме одлучиле. Сите истражувања и анкети покажаа дека е важно колкава поддршка има секој од кандидатите. Кога ќе видите дека повеќе од 60 отсто од граѓаните велат дека не заслужува да биде реизбран, тогаш имате јасна порака дека треба да настапите со ново кадровско решение, за кое има многу попозитивни реакции кај граѓаните и нема тие негативни поени“,
рече Заев.