Командирот на тимот на Територијална противпожарна единица, Среќко Чимевски вели дека со настанување на пожарот, граѓаните пријавиле и силна експлозија, по што е утврдено дека експлодирале плински боци
Во подрумските простории во зграда на на улицата „23 октомври“ во Аеродром попладнево избувна пожар, а противпожарните екипи веќе интервенираат на терен. Причината за пожарот сè уште не е позната, но по негово настанување, експлодирале и две плински боци.
Командирот на тимот на Територијална противпожарна единица, Среќко Чимевски, за МИА вели дека со настанување на пожарот, граѓаните пријавиле и силна експлозија, по што е утврдено дека експлодирале плински боци.
Според очевидците, пожарот настанал или од заварување или од дотраена инсталација.
На терен интервенирале две противпожарни возила и десет пожарникари обезбедени со кислородни боци. Пожарот е локализиран во првата фаза, а во моментов се проверува дали е целосно изгаснат.