По средбата со грчкиот колега, шефот на македонската дипломатија изјави дека, меѓу другото, се разговарало и за начините за ратификација на меморандумите кои подолго време чекаат „виза“ во парламентот во Атина
Грција силно ги поддржува Северна Македонија и целиот Западен Балкан на патот кон Европската Унија. Грција е и може да биде ваш најголем пријател и соработник. Изборот што го направивте да стоите до нас, да одите по патот до големото европско семејство е вистинскиот избор за благосостојба на вашиот народ. Треба да продолжи имплементацијата на Преспанскиот договор, кој е основа за подобрување на заемните односи и влез на земјата во европското семејство, изјави денеска шефот на грчката дипломатија Никос Дендиас, кој е во официјална посета на земјава.
Грција, посочи тој, е задоволна од она што досега е направено во насока на имплементација на овој договор.
„Направени се многу скорешни чекори од кои еден е тргањето на таблата пред зградата во која се наоѓаме, поставена во други времиња и го претставуваше кралот Филип, таткото на Александар Велики, бидејќи договорени сме заедно дека тогаш вашите предци сè уште не биле пристигнати на Балканскиот Полуостров и немале можност да војуваат под водство на Александар Велики во длабочината на Азија, променето е и името на Археолошкиот музеј, а променети се таблите на граничните премини“,
рече Дендиас и додаде дека имплементацијата на договорот не е бирократска работа, туку треба да се имплементира секоја буква и за тоа, како што рече, има временска рамка.
Тој смета дека треба да се инвестира во младата популација на која ќе ѝ се дадат потребните алатки за да ја гледаат нашата заедничка иднина, а не да гледаат во минатото. Исто така, нагласи грчкиот шеф на дипломатијата, треба да се спречат појаснувања на договорот кои се погрешни и го попречуваат неговото спроведување.
Дендиас, на денешната прес-конференција со неговиот колега Бујар Османи, рече дека на средбата што ја имал со него разговарале за овие теми, но и за соработката во економијата, инфраструктурата …
Според него, значаен чекор е договорот за природен гас, заштитата на воздушниот простор на Северна Македонија од страна на Грција, како и заедничката соработка што се реализира во делот на заштита на византиски и подвизантиски споменици.
Министерот Османи го информирал својот соговорник дека Владата на Северна Македонија продолжува да биде посветена на реализирањето на обврските предвидени со Преспанскиот договор, изразувајќи уверување дека Грција ги препознава и вреднува нашите напори, што ќе биде дополнителен мотив што побргу да биде завршена ратификацијата на неколку меѓународни договори во грчкиот парламент. Со тоа, дополнително ќе се овозможи унапредување на билатералната соработка во дадените сегменти.
Тој упатил благодарност за цврстата поддршка на Владата на Грција за почеток на пристапните преговори за членство на Северна Македонија во ЕУ, како и уверување дека таквата поддршка нема да изостане и во периодот што е пред нас. Грција продолжува да биде силен лобист за нашата интеграција и започнувањето на пристапните преговори, кои Северна Македонија посебно го цени, нагласи Османи.
Соговорниците ја искористиле можноста и за размена на мислења и ставови за најновите состојби во регионот, регионалната соработка, кризните жаришта и акциите преземени за нивно надминување, при што било нагласено дека, како сојузници во НАТО и стратешки партнери во ЕУ, неопходна е заедничка координираност за максимизирање на ефектите.
„Имплементација на Преспанскиот договор е жив процес во кој е важно да има политичка волја. Тоа што денеска го констатиравме е дека силно веруваме во тој договор, силно веруваме во перспективата на нашето пријателство, во нашето стратешко партнерство. Силно веруваме во економските потенцијали, во соработката на сите можни сектори“,
изјави шефот на македонската дипломатија Бујар Османи по средбата со Дендиас.
Во однос на имплементација на Договорот од Преспа од грчка страна, меморандумите и заедничката комисија за образовни прашања, Османи рече дека Преспанскиот договор е договор кој е основа на нашите билатерални односи, на новата регионална архитектура и тоа е неповратен процес. Тоа, вели Османи, е во интерес на нашата држава и ја гарантира перспективата на државата, на нашите билатерални односи и никој нема да дозволи да се загрози Преспанскиот договор.
„Прашањата што ги покренавме во однос на ратификација на одредени договори и меморандуми во грчкиот парламент ги отворив и јас на средбата и прашањето на сообраќајните знаци во Грција. Разговаравме по однос на техничките причини за неисполнување на тие прашања во грчкиот парламент и договоривме начин како тоа ќе се направи во наредниот период. Во однос на таблите, објаснувањето е дека локалните власти се тие што не покажуваат ентузијазам, меѓутоа и по однос на тоа прашање разговаравме пошироко и мислам дека во наредниот период ќе има решение и за тоа“,
посочи Османи.
Министерот рече дека грчката страна ги исполнила најважните обврски во однос на Преспанскиот договор, а тоа е поддршката за членство на С Македонија во НАТО и поддршката за почеток на преговорите за ЕУ.
„Тоа беа двете суштински обврски за Грција по однос на Преспанскиот договор. Прашањата на меморандумите се прашања на секторската соработка, прашања на постигнување на стрататешкото партнерство, тоа е жива материја, има многу договори што треба да се потпишуваат, на пример кај нас, договорот за двојно оданочување“,
рече Османи.
Министерот рече дека интензивно се следи имплементацијата на Преспанскиот договор, обврските што произлегуваат од градењето на стратешкото партнерство во секторската соработка, меѓутоа и обврските што произлегуваат од членот 8 од Договорот, а тоа е имплементација на промена на името. Тоа следење, рече Османи, се случува на неделна основа преку Акциски план во кој се имплементираат конкретните обврски од двете страни.
Министерот информира дека она што е последно направено од имплементацијата на тој Акциски план е адаптација на името на Археолошкиот музеј каде што, рече тој, поради логистичко-технички причини не можеше досега да се направи, но, вели, направиле напори да се направи соодветната адаптација. Во однос на промената на улиците, рече Османи, тоа е одлука на Советот на Град Скопје, при што улицата каде што се наоѓа МНР е сменета од „Филип Втори“ во „Стив Наумов“, меѓутоа, додаде, таа одлука не може да се имплементира пред локалните избори, затоа не е ставена нова ознака со новото име.
Министерот подвлече дека по оваа средба односите со Грција ќе бидат уште посилни. На состанокот, информира Османи, станало збор и за брзиот меѓуграничен железнички транспорт, а се зборувало и за отворањето на новиот граничен премин „Маркова Нога“.
Освен со министерот за надворешни работи на Северна Македонија, шефот на грчката дипломатија во Скопје се сретна со претседателот Стево Пендаровски, со премиерот Зоран Заев, вицепремиерот за европски прашања Никола Димитров, како и со претседателот на Собранието Талат Џафери.