Нов негативен рекорд од 30 новозаразени во едно деноноќие е регистриран во Дебар што е највисока бројка на дневно ниво од почетокот на пандемијата.
„Ова е последователна висока бројка на новозаразени по онаа на 14 месецов кога беа потврдени 23 нови случаи. За жал како и во поголемиот дел од државата и во Дебарско во континуитет расте бројот на заразени со ковид-19. Само во текот на овој месец опасниот вирус е потврден кај 131 лице од општините Дебар и Центар Жупа“,
изјавија за МИА од дебарската општа болница.
Додаваат дека бројот е многу поголем затоа што има и такви кои се тестираат приватно, односно со брзи тестови и нема евиденција за нив, а за лекарска услуга се јавуваат кога ќе почувствуваат поголеми потешкотии.
Овој месец во списокот на оздравени се внесени 32 лица, додека починале шест.
Вкупната бројка заразени од почетокот на епидемијата е 1 122, битката со вирусот ја загубиле повеќе од 50, а активни случаи моментно се 144.
„Од вкупно активните, 15 се хоспитализирани во ковид-центарот во нашата установа, сите на кислородна подршка, двајца пациенти имаме во здравствени установи во Скопје, дваесеттина се на амбулантско лекување, што подразбира дека добиваат терапија, малку одмараат и заминуваат дома“,
вели директорот на дебарската болница, Баки Алили.
Според него, се поголем е интересот за вакцинација што го потврдува и бројката од околу 1 100 аплицирани вакцини во последните пет дена.