За лидерот на опозициската ВМРО-ДПМНЕ, Христијан Мицкоски, е погрешен потег нашата држава да прима многу повеќе бегалци од Авганистан од побогати држави од нас.
„Навистина сум вчудоневиден со која леснотија се предлага ваков тип политика од страна на Владата имајќи предвид дека богатите скандинавски земји примаат едноцифрен број, дел од богатите балкански земји, Словенија, Хрватска, дел од балтичките земји, Естонија, исто така, прифаќаат едноцифрен број луѓе, Авганистанци кои практично работеле за владите на тие држави во Авганистан“,
рече Мицкоски во интервју за ТВ Сител.
Мицкоски рече дека би сакал да види поголема солидарност од побогатите држави во Европа бидејќи една мала држава како Македонија, која, како што рече, континуирано е уценувана за да почне да преговара со ЕУ, прима до десет пати повеќе бегалци. Нагласи дека тоа за него е неприфатливо.