Четиринаесет лица и натаму се на аеродромот во Кабул, од кои 11 уште денеска ќе се евакуираат, а три ќе останат до конечно повлекување на војската, соопшти на прес-конференција министерот Османи
Од НДИ е пристигнато барање за прифаќање околу 200 лица, жени, деца и вработени во оваа организација во Авганистан за привремено сместување во Македонија
Шеесет наши државјани веќе го напуштиле Кабул и се наоѓаат во Доха или Абу Даби од каде ќе се вратат во земјава. Четиринаесет наши граѓани, пак, и натаму остануваат во Авганистан, од кои 11 ќе заминат уште денеска, додека тројца остануваат до конечно повлекување на американската војска.
Министерот за надворешни работи Бујар Османи на денешната прес-конференција информира дека сите наши државјани кои остануваат засега во Авганистан се безбедни.
„Ти се наоѓаат во база која прилепена за аеродромот и се безбедни. Последните тројца ќе се евакуираат со целосното повлекување на војска“,
рече Османи.
Кога ќе дојдат нашите граѓани од Доха и Абу Даби, зависи од тоа кога се комерцијалните летови. За нив Османи рече дека ќе бидат во своите домови, а според протоколите што ги подготуваат во Комисијата за заразни болести, ќе се утврди нивниот вакцинален статус и состојбата.
Во земјава ќе пристигнат и околу 200 цивили од Авганистан, за кои има барање од Националниот демократски институт од САД (НДИ) и тоа се главвно жени, деца и вработени во оваа организација во Авганистан и за нив веќе се прават списоци каде ќе бидат сместени, во капацитети кои изразиле спремност да ги примат.
Дали ќе одат во карантин исто така ќе се одлучува врз основа на нивната состојба и вакциналниот статус.