Штетите во населените места, во селата и во градовите, се навистина мали, имајќи го во предвид обемот на пожарите што ја зафатија државата, вели директорот на ЦУК
Вкупно 106 поголеми шумски пожари имало во земјава во изминатиот период, од кои најлошиот беше тој што ги зафати општините Берово, Пехчево и делумно Делчево, а кој е успешно изгаснат, информира директорот на Центарот за управување со кризи (ЦУК), Стојанче Ангелов.
Тој посочи дека се изгорени десетина објекти, пред се стари куќи и придружни објекти, како што се штали, плевни и слично и изгорен е покрив на куќа во Кочани.
„Општините формираа комисии кои детално ќе ја утврдат штетата и граѓаните ќе бидат праведно обештетени. Воедно и Владата е тука, ако има некаде поголема штета, да ја надомести. Но во овој момент слободно можеме да констатираме дека штетите во населените места, во селата и градовите, се навистина мали, имајќи го во предвид обемот на пожарите што ја зафатија државата“,
рече Ангелов.
Тој најави можно укинување или намалување на забраната за движење низ шуми.
„Оваа мерка помогна за намалување на бројот на пожарите, а сега, доколку е стабилна состојбата, ќе побараме од Национални шуми да биде тргната или намалена, односно движењето низ шуми да биде само со дозвола“,
информира Ангелов, откако ЦУК соопшти дека од попладнево се активни само уште два пожари.
Во моментов, како што посочи, активна поддршка на Главниот штаб за управување со кризи даваат инструктори од САД.
„Овие пожари ни ги покажаа слабостите за кои бевме свесни, но овој пат постои црвста намера за длабоки реофрми со кои ќе ги отрстраниме сите согледани недостатоци. Активно подготвуваме план за реформи. Ќе формираме широко тело кое ќе се зафати со овие коренити реформи и верувам во следните месеци ќе успееме да ги поставиме основите на новиот систем за управување со кризи, единствен кој ќе ги опфати сите чинители кои се расфрлани во неколку институции“,
рече Ангелов.
Лажна вест е, додаде, дека од австриските пожарникари е украдена пила.