Пакет мерки со финансиска помош за уништените или оштетени домови и бизниси од катастрофалните пожари во изминатата седмица во Грција, одобри грчката Влада на денешната вонредна седница.
Премиерот на Грција, Кирјакос Мицотакис, соопшти дека ќе се додели помош до 150 000 евра за уништени или оштетени домови со итен аванс од 20. 000, 15 000 или 5.000 евра, во зависност од штетата на објектот.
Мицотакис истакна дека аваност веднаш ќе биде исплатен, откако претходно граѓаните чии домови изгореа или претрпеа штети, ќе се регистрираат на специјална интернет платформа што ќе се отвори следната седмица. За бизнисите погодени од пожарите, обесштетувањето ќе биде 70 отсто од загубата, а 20 отсто ќе се даде во вид на аванс во висина од пет до 22 илјади евра во зависност од штетата.
Дополнително, жителите и бизнисите погодени од пожарите се ослободени од данокот на сопственост на недвижнини, а се одложуваат сите даночни и кредитни обврски. Паралелно, ќе добијат субвенција за кирија во висина од 500 евра, се’ додека не се поправат нивните домови.
Мицотакис објасни дека мерките што ги одобри Владата се на три нивоа. Првото, се однесува на итно обесштетување на физичките и правните лица, второто е на обнова, чистење и пошумување, а третото на среднорочно и долгорочно планирање на продуктивната обнова, особено на Евија.