Организирањето на Олимписките игри во Токио станува сѐ поголема главоболка за премиерот на Јапонија, Јошихиде Суга, чиј рејтинг, според весникот „Асахи шимбун“, по првпат падна под 30 отсто.
Две третини од гласачите го осудија владиното справување со пандемијата на ковид-19, покажа истражувањето на овој јапонски весник. Суга очекуваше дека Олимписките игри ќе ја зголемат неговата популарност, но се случи спротивното, додека бројот на луѓе што заболеа од ковид во Јапонија во меѓувреме се зголеми.
Анкетата, спроведена од 7 до 8 август, покажа дека неговиот рејтинг се намалил на 28 проценти од 31 отсто во претходното истражување, спроведено од 17 до 18 јули, пред свеченото отворање на Олимписките игри на 23 јули. Либерално-демократската партија на премиерот Суга очекуваше дека успешните Олимписки игри во Токио ќе доведат до зголемување на поддршката за неговиот кабинет пред изборите за Долниот дом наесен.
Последната анкета покажа дека 56 проценти од гласачите сметаат дека одлуката за одржување на Летните олимписки игри е вистинската. Но, бројките поврзани со Олимпијадата не се претворија во поголема поддршка за Суга.
За време на вториот мандат на Шинзо Абе како премиер, од 2012 до 2020 година, најниската поддршка за неговиот кабинет беше 29 проценти и беше забележана во мај минатата година. Откако Абе поднесе оставка во септември минатата година, Суга ја презеде функцијата во земјава која се подготвуваше за веќе одложените Олимписки игри, борејќи се со ширењето на новиот коронавирус.
Сега, кога Олимпијадата заврши, само 32 проценти од гласачите рекоа дека настанот се одржал на безбеден начин, особено затоа што во меѓувреме се зголемил бројот на заболени од коронавирус во Јапонија.