Скопското обвинителство поведе постапка против ресторан во Скопје бидејќи, спротивно на протоколот за работа на угостителските објекти, во две целосно затворени сали била организирана прослава и предложи на управителот да му биде определена парична казна од 2 000 евра, додека правното лице да биде казнето со парична казна од 300 000 денари (околу 5 000 евра)
Основното јавно обвинителство Скопје поведе постапка за управителот и за фирмата која стои зад еден ресторан за кривично дело непостапување според здравствените прописи за време на епидемија од член 206 од Кривичниот законик.
„Обвинетото правно лице – ресторан и неговиот управител на 18.8.2020 година не постапиле согласно прописите со кои беа определени мерки за превенција и заштита на населението од заразни болести. При контрола од Државниот пазарен инспекторат во ресторанот било утврдено дека спротивно на протоколот за работа на угостителските објекти, во две целосно затворени сали на ресторанот се организирале прослави и се послужувале гости. Во едната сала била организирана свадба со околу 150 лица, а во другата – прослава со околу 20 лица Со ова правното лице сторило кривичното дело од став 2, а физичкото лице од став 1 на наведениот член од Кривичниот законик“,
наведуваат од Јавното обвинителство.
Од Обвинителството доставиле до Основниот кривичен суд Скопје предлог за издавање казнен налог со кој предложиле на обвинетиот управител да му биде определена парична казна од 100 дневни глоби со поединечна висина на дневната глоба од 20 евра во денарска противвредност, додека правното лице да биде казнето со парична казна од 300 000 денари.