Машинскиот персонал во „Железници Транспорт“ изутринава од седум часот ја бојкотира работата, поради што ќе биде во прекин патничкиот и товарниот железнички сообраќај, изјави за МИА Душко Чакаровски, претставник на вработените.
Изутрината заминале патничките возови за Битола и за Гевгелија, а останатите предвидени со возниот ред нема да сообраќаат до исполнување на нивното барање за зголемување од 30 на 40 проценти на надоместот на плата за квалитет. Тие се повикуваат на Колективниот договор за дополнителна работа и работење со намален број на извршен персонал.
Чакаровски вели дека за нивното барање вчера имале средба со членовите на Управниот одбор на „Железници Транспорт“ и со министерот за транспорт и врски Горан Сугарески, но не бил постигнат договор со образложение дека евентуалната исплата на повисок надомест ќе се одрази на редовната исплата на платите.
Надомест на плата за квалитет во износ од 40 проценти на машинскиот персонал му бил исплаќан до пред антикризните мерки во 2008 година.
Чакаровски потенцира дека бојкотот на работата не го организира ниту една синдикална организација, туку машинскиот персонал од различни синдикати и работници кои не членуваат во синдикатите.