Според Владата, видеонадзорот и боди-камерите со кои се планира да се снима работата на службениците треба да биде механизам за превенција од корупција. За Синдикатот на работниците од управата, правосудните органи и здруженијата на граѓани – УПОЗ, пак, ваквите предлози се нехумани и дискриминаторски
Предлозите за поставување на видео надзор и боди-камери за регулирање на работата на службениците кои директно преку физички контакт работат со граѓаните, не се однесува на целата администрација, велат од Владата.
Владиниот портпарол, Душко Арсовски, на денешната прес-конференција рече дека предлогот за поставување на видео надзор и боди камери се однесува за службениците коишто вршат контрола, надзор и посебни овластувања особено во процесите коишто, како што рече, не можат да се дигитализираат и вклучуваат неопходно учество на човечкиот фактор.
Овој предлог, нагласи Арсовски, во наредниот период детално ќе се анализира од аспект на негова имплементација, опфатот на службениците, обезбедувањето на сигурноста и приватноста на граѓаните, како и техничките и законските можности.
„Дигиталната трансформација на процесите е врвен приоритет на Владата како клучен механизам за сузбивање на корупцијата и за брзи и ефикасни услуги кон граѓаните за институциите коишто се токму во служба на граѓаните. Работна група веќе работи на подготовка на измените и дополнувањата на потребните закони за дигитална трансформација“,
изјави Арсовски.
Сите измени и дополнувања на потребните закони за дигитализација, посочи Арсовски, ќе бидат подготвени и доставени до Собранието до крајот на август.
Предлозите за поставување видео надзор и боди-камери за службениците, Влада ги разгледуваше на вчерашната седница, посочувајќи дека целта е превенција од корупција. Тие биле разгледувани во рамки на дискусијата за Планот за борба против корупција кој предвидува дигитализација на процесите што треба да го намали директниот контакт на службениците и граѓаните, а со тоа и да ја намали корупцијата.
Работната група, посочија од Владата, веќе ги подготвува и сите предлог-измени на закони за да може да се спроведе дигитализацијата и, како што информирал вицепремиерот за борба против корупцијата, Љупчо Николовски, истите ќе бидат подготвени и испратени во Собранието до крајот на август.
Но, најавите веднаш наидиа на критики. Предлозите за снимање на службениците се нехумани, противзаконски и дискриминаторски, порачаа денеска од Синдикатот на работниците од управата, правосудните органи и здруженијата на граѓани – УПОЗ.
Владата, нагласуваат од УПОЗ, е должна да го консултира и да го вклучи Синдикатот како социјален партнер при донесување на вакви законски решенија кои се однесуваат за условите за работа што е пропишано и со законите и со колективните договори и сметаат дека ваквите предлози доаѓаат како одговор на нивното барање да одпочне преговори за платите на администрацијата бидејќи, како што велат, 95 проценти од вработените имаат плата под просекот на државата.
Синдикатот на УПОЗ, во соопштението нагласува дека никогаш нема да се согласи вработените да бидат снимани со камери и на себе да носат камери, како и дека ќе се обрати до Владата со барање итно да се стопираат ваквите предлози и Синдикатот задолжително да биде вклучен во донсесување на прописите кои ќе ја регулираат оваа материја.