Епидемиолошката состојба во земјава е стабилна и поради тоа има олабавување на речиси сите мерки за заштита од ковид-19, вели министерот за здравство Венко Филипче.
Според него, продолжува трендот на опаѓање на бројките на нови случаи.
„Претходната недела имаше седум, па шест, а вчера пет пациенти на 100 000 граѓани, што дефинитивно е знак дека нема промени“,
рече Филипче денеска одговарајќи на новинарско прашање.
Тој додаде дека надлежните се многу внимателни во однос на следењето на состојбата со коронавирусот, пред сѐ, со индискиот сој на вирусот кој се појави во повеќе земји.
Ние, како што рече, можеме да го спречиме ширењето со тоа што нема локално да се групираме. Тој потенцира дека е многу важна свеста на граѓаните и почитувањето на мерките кои беа во сила, оценувајќи дека сите научивме да живееме со мерките што ги препорачуваат Владата и Комисијата за заразни болести.
„Трендовите на намалување на бројките продолжи и нормално е кога има такво намалување на бројките да има попуштање и обратно – ако има некакво зголемување или најава, ќе воведеме некакви рестрикции“,
рече Филипче.
Министерот за здравство рече дека сè уште нема дозвола за работа на затворените дискотеки и веројатно нема ни да има во текот на летото. Тој потенцира дека сега е лето и работат дискотеките на отворено, па нема потреба да се дава екстра простор за групирање.