Демократскиот сојуз предлага пратениците и министрите во текот на јули и август наместо на одмор да одат на работа со цел, како што велат,овој период да се искористи за подготовка и носење на закони за непречена работа на компаниите, подготовки за враќање на учениците и студентите во училиштата и факултетите и спроведување на реформи неопходни за имплементација на стандардите на Европската унија.
„Демократскиот сојуз смета дека летниот период треба да се искористи и за изградба на заокружен и ефикасен систем за борба против тешките облици на криминал и високата корупција, борба против урбаната мафија и мафијата која и натаму остварува високи профити со продажба на канцерогени нафтени деривати, како и депонирање на опасен отпад.Мора да продолжат реформите во судскиот систем, како и донесување на посебна програма за департизација на службите за безбедност и администрацијата“,
се вели во соопштението на Демократскиот сојуз.
Во него се додава дека летниот период треба да се искористи и за подготовка на Платформа со цел поеофикасно справување со пандемијата, имунизацијата на населението и рерганизација на здравствениот систем.
„Поради пандемијата многу реформи доцнат, поради што сметаме дека само со дополнителни напори и работа можеме да опстоиме на патот кон Европската унија и да создадеме подобри услови за работа и подобар живот за сите граѓани“,
велат од Демократскиот сојуз.