Премиерот Зоран Заев вели дека не ги разбира протестите на опозициската ВМРО-ДПМНЕ во врска со преговорите со Бугарија. Тој вели дека она што се преговара со официјална Софија е патоказот, додека сè друго се разговара под раководство на португалското претседателство чиј предлог, вели премиерот, е доставен и на Христијан Мицкоски.
Затоа, потенцира тој, не му се јасни протестите на опозицијата и додава дека можеби се организираат поради стравот да се направи исчекор кон ЕУ.
„Португалскиот предлог е доставен кај нас, кај бугарската страна и кај Мицкоски и апсолутно добро знае дека предлогот е одличен и појдовна основа за постигање на решението. Сега да продуцирате протести со по 15 возила и 20 луѓе, 13 возила и 14 луѓе, само да се блокира сообраќајот низ градовите е порака која никако не можам да ја разберам. Веројатно е страв дека постои можност да направиме исчекор кон ЕУ и нашите интеграции и конечно да имаме прва меѓувладина конференција и навистина очекувам најмалку да се помогне, наместо да се блокира, но не е ништо ново. Во последните 4 години, ВМРО-ДПМНЕ освен блокади, кочници и правење опструкции на важните процеси кои ја блокираат македонската иднина, друго немаме видено. Секој со својата одговорност. Од сценаријата што ги кажа Мицкоски верувам ниту едно не е прифатливо за граѓаните на нашата земја“,
изјави Заев.
Мицкоски на вчерашниот брифинг со новинарите рече дека двоецот Заев-Бучковски преговара со техничката бугарска влада за делови од декларацијата, која беше усвоена во бугарскиот парламент во 2019 година.
Според Мицкоски, има две решенија за Македонија да добие зелено светло за отпочнување преговори за членство во ЕУ. Првото решение, за кое смета дека е најмалку веројатно, е Европскиот совет да донесе одлука без условувања и да извршат притисок врз бугарскиот претседател Румен Радев и техничката влада. Но, за ова да се случи, според проценките на Мицкоски, шансите се 5 отсто.
Во второто решение, според Мицкоски, има две потпатеки. Првата потпатека е двоецот Заев-Бучковски да прифати дел од бугарската декларацијата и директно да преговараат за идентитетот, јазикот и за културата, и тоа според него ќе бидат преговори без крај. Втората потпатека е сите овие барања да бидат прифатени усно со изговор дека Бугарија има техничка влада и дека преговорите за спорот ќе продолжат откако ќе се формира новата влада. Тој вели дека доколку се случи второто сценарио, проблемот со Бугарија нема да остане само меѓу Македонија и Бугарија, туку ќе прерасне во проблем меѓу земјава и ЕУ.