Владата вчера ги разгледала извештаите за увезените мазут и индустриско масло, но дадени се насоки да се направи поопсежна анализа за последните десет години за сите компании кои увезувале во овој период.
Вицепремиерот задолжен за економски прашања, координација на економските ресори и инвестиции Фатмир Битиќи денеска вети дека секој што направил пропуст или злоупотреба ќе сноси одговорност, без разлика дали се работи за институција или компанија.
„За жал, во првичните анализи се опфатени само дел од компаниите што увезувале мазут или индустриско масло во периодот од последните две години. Дадовме насоки да имаме поопсежна анализа за последните десет години за сите компании што имаат увезено мазут или индустриско масло и во моментот кога ќе ги добиеме сите информации бидете уверени дека секој ќе сноси одговорност за тоа што го правел, без разлика дали е тоа Царинска управа, Пазарен инспекторат, Инспекторат за животна средина, министерство или компанија што увезувала“,
изјави Битиќи одговарајќи на новинарско прашање по посетата на компанијата „Пејпер мил“ во Кочани.