Годинешното јубилејно 20. издание на фестивалот на музика од светот „Оффест“ нема да се одржи на планираните термини од 2 до 6 јуни, туку се поместува за 9 до 13 ноември. Според оргнизаторите единствена причина за одложувањето на веќе подготвената фестивалска програма е доцнењето на договорот, придружната документација и исплатата на неопходниот аванс од страна на Министерството за култура. Од друга страна пак, од Министерството за култура велат дека тие доставиле договор до организаторот Скопје џез фестивал, но апликантот не го потпишал и дополнително поднел и забелешки.
„Ова е прв ваков случај во историјата на ‘Оффест’, како и на постариот Скопски џез фестивал, на кој искрено се надеваме дека нема да му се случи нешто слично. Фестивалот, годинава со значително скратен буџет, во најголем дел ќе ја зачува веќе подготвената програма, првично предвидена за реализација во јуни, со истото планирано фестивалско отворање, а тоа е концертот на модерниот фадо дует Лина- Раул, колаборативен проект на португалската фадо дива Лина Родригез и популарниот шпански артист Раул Рефри, еден од најбараните и најиновативните светски продуценти во моментов“,
информираат организаторите на фестивалот.
Од Министерството за култура велат дека имаат разбирање за сите потешкотии со кои се соочуваат апликантите при реализацијата на нивните проекти во вонредни услови на светска пандемија, вклучително и за потребата за поместување на термините за одржување на настаните.
„Како што се случи и минатата година со ‘Оффест’, така и годинава постои можност на секој корисник да му се дозволи промена на терминот за реализациоја на проектот. За најавеното одложување на ‘Оффест’ од јуни за ноември, Министерството за култура информира дека договорот за учество во финансирањето на ‘Оффест’ е навремено доставен до организаторот – Скопје џез-фестивал. И покрај тоа, апликантот не само што не го потпиша договорот туку поднесе и забелешки. Апликантот во неколку наврати е информиран за текот на постапката како и за тоа дека непотпишан договор не произведува правно дејство. Оттаму, нејасно е неговото прозивање на Министерството за култура“,
велат од Министерството.
Според податоците на Министерството за култура објавени на нивната веб-страница, од Годишната програма за финансирање на проекти од национален интерес за годинешното издание на „Оффест“ се одобрени 2 милиони и 10 илјади денари.