Според најновиот извештај на „Репортери без граници“, објавен минатиот месец, С Македонија бележи подобрување од две места во глобалниот индекс за слобода на медиумите и е на 90. место, но се соочува со критики за заканите и нападите кон новинарите и медиумите
Во време кога независното и слободно известување за медиумите е поважно од кога и да е, слободата на медиумите е сè уште под закана, изјави денеска високиот претставник на Европската унија за надворешна политика и безбедност, Џозеп Борел, по повод 3 мај – Светскиот ден на слободата на медиумите.
Новинарите продолжуваат да имаат тешки работни услови со зголемен финансиски и политички притисок, надзор, произволни затворски казни или се изложени на насилство заради вршење на својата работа, вели Борел, објави Европската служба за надворешно дејствување (ЕЕАС).
Според Организацијата за образование, култура и наука на Обединетите нации (УНЕСКО), 76 новинари се убиени од 2020 година, додека многу се уапсени, малтретирани или се под закана поради својата работа.
Борел исто така смета дека родовото базирано насилство кон жени новинарки предизвикува особена загриженост.
Според него, повеќе од 400 новинари го користеле механизмот на ЕУ за заштита на човековите права во 2020 година, додека ЕУ презела активности за поддршка на новинари, независни медиуми и борба против дезинформации во контекст на епидемијата од коронавирусот.
Борел рече дека ЕУ е решена да стори повеќе, дека ќе продолжи да се координира со меѓународните организации и механизми и дека ќе воведе нови пристапи.
„Слободата на информирање и слободата на говорот мора да бидат промовирани и заштитени насекаде. ЕУ ќе продолжи да се спротивставува на какви било ограничувања на слободата на изразување и цензура“,
рече Борел.
Слободата на медиумите е камен-темелник на демократското општество, кое може да напредува само доколку граѓаните имаат пристап до сигурни информации, се додава во соопштението.
Трети мај – светскиот ден на слободата на печатот е утврден со одлука на Генералното собрание на ООН во 1993 година, за да ги потсети владите на државите дека тие се должни да го почитуваат и поддржуваат правото на слобода на изразување загарантирано со членот 19 од Универзалната декларација за човекови права.
Според најновиот извештај на „Репортери без граници“, објавен минатиот месец, С Македонија бележи подобрување од две места во глобалниот индекс за слобода на медиумите и е на 90. место, но се соочува со критики за заканите и нападите кон новинарите и медиумите.
Според невладината организација, промените во Кривичниот законик кои ги подготвува Министерството за правда би требало да донесат поголема заштита за новинарите во државата.
Од Владата велат дека сериозно ги сфаќаат забелешките и апелираат секој случај на каков било притисок или напад врз новинарите или медиумите да биде пријавен во полиција како најбрз начин да се сузбијат ваквите појави.