Се предвидува период на мајчинство, кој ќе го користи мајката, родителство кое би го користеле двајцата родители и татковство кое ќе биде кратко, во траење од 10 дена
Деталите за предлогот за породилното отсуство сѐ уште не се разработени, така што јавната дебата за тоа би била некаде во јуни, најави денеска министерката за труд и социјална политика Јагода Шахпаска одговарајќи на новинарско прашање, кога најрано би можело да се очекува да стапи во сила оваа реформа.
„Заедно со социјалните партнери се работи во МТСП на новиот системски закон за работни односи и едно поглавје е за породилното отсуство. Деталите не се изработени до крај, но новината е што се предвидува период на мајчинство, кој ќе го користи мајката, родителство кое би го користеле двајцата родители и татковство кое ќе биде кратко, во траење од 10 дена“,
открива Шахпаска и додава дека прво ќе се објави нацрт-верзијата со усогласување на ставови на академската фела и експерти во трудовото право, а во јуни ќе има општа дебата.
На прашањето дали Фондот за здравствено осигурување би можел да го издржи тој товар уште три месеци да исплаќа за породилно отсуство (од сегашните 9 месеци, на 12 во иднина), Шахпаска рече дека тие средства се предвидени од буџетот и ќе се префрлаат во Фондот.