Стручните екипи ќе работат и за време на празниците за да се оспособи пругата на Коридорот 10, информира директорот на Јавното претпријатие за железничка инфраструктура „Железници“, Хари Локвенец, откако утринава товарен воз се излизга од пругата кај кумановско Романовце. Откако ќе се отстранат вагоните, ќе се работи на санација на пругата за да продолжи железничкиот сообраќај, кој е во прекин по несреќата.
„Најдобриот дел во една ваква несреќа е што нема човечки жртви, но има голема материјална штетата и не само моменталната туку и сета онаа загуба која сите заедно ја претрпуваме и ќе ја претрпуваме заради нефункиоцнирањето за нас многу важниот Коридор 10 од железничката пруга и поврзаност на нашата држава со целиот свет“,
изјави Локвенец.
Стручна екипа, експерти од „Македонски железници – транспорт“ и „Македонски железници – инфраструктура“ ќе оценува која е причината и колкава е материјалната штета од несреќата. Товарниот воз што пренесуваше камен се излизга утрово во 09:20 часот од Трубарево до Романовце. Превртени се 12 вагони од композицијата која има вкупно 20.