Техничката влада на денешната седница треба да ја утврди потребата од измени на Изборниот законик, што значи дека оваа регулатива допрва треба да помине на владина седница, а потоа да биде пуштена и во собраниска процедура
Иако до распуштањето на деветтиот собраниски состав има уште дваесетина дена, сè уште не се донесени измените на Изборниот законик што произлегуваат од препораките на ОБСЕ/ОДИХР. Тоа и годинава ќе се прави во „пет до 12“, откако стана извесно дека и за претстојните парламентарни избори останува истиот модел – со шест изборни единици. Техничката влада на денешната седница треба да ја утврди потребата од измени на Изборниот законик, што значи дека оваа регулатива допрва треба да помине на владина седница, а потоа да биде пуштена и во собраниска процедура. Вицепремиерот Бујар Османи, за време на денешната посета на ДИК, најави дека Владата денеска ќе информира за потребата за носење на измените на Изборниот законик, кои се во нацрт-верзија и сè уште не се во владина процедура. Последната собраниска седница ќе биде закажана на 3 февруари, рече Османи.
„Овој пат е најважно да имаме фер и демократски избори заради евроинтеграцискиот процес. Овој пат навистина е така. Пресвежа ќе биде меморијата на сите земји членки на ЕУ кога ќе се разговара за нас во март, а на 26 март ќе биде четвртиот ден од изборната кампања. Секое отстапување од нормален изборен процес ќе биде свежo во сеќавањето на земјите членки кога ќе ја носат одлуката. Затоа овој пат одговорноста е најголема“,
рече Османи.
Државната изборна комисија, во меѓувреме, ги почна подготовките за изборите, во очекување тие да бидат распишани, а претходно да биде изменет и Изборниот законик. ДИК заседава денеска, а претседателот на Комисијата Оливер Деркоски во интервју за МИА рече дека најавените измени на Изборниот законик, кои сè уште не се во собраниска процедура треба да бидат што поскоро донесени за да има време правилно да се имплементираат.
„Затоа и се предвидени одредени стандарди од ОБСЕ/ОДИХР, како организација која најчесто ги набљудува изборите и изборните активности во повеќе држави во Европа и во светот. Една година пред да се одржат избори не е препорачливо да се менуваат изборните регулативи во државите, меѓутоа, за жал, кај нас, праксата е поинаква. Многу често се менува Изборниот законик. Повеќе од 30 пати само овој Изборен законик е променет од неговото донесување и тоа практично нè носи до ситуација кога треба ад хок да се подготвуваме за одредени законски измени и би рекол да импровизираме одредени решенија, што не е добро“,
изјави Деркоски.
Тој смета дека е потребно да се донесе нов Изборен законик бидејќи честите промени доведуваат до колизија на повеќе норми, што претставува во самиот законик и тоа претставува проблем во неговата имплементација.
„Работната група што ја предводи Министерството за правда веќе подолг период работи на некои измени на Изборниот законик, со цел да се имплементираат одредени забелешки на мисијата на ОБСЕ и ОДИХР, меѓутоа и на некои други забелешки кои се посочени од повеќе фактори што учествуваат во изборните процеси. Јас се надевам дека ќе се приближи кон некаков крај и дека навреме ќе имаме завршеток за да може и ние како ДИК да можеме навреме да се подготвиме со новите изменети законски норми. Овие работи треба да се прават навреме за да има доволно време да се имплементираат правилно“,
изјави Деркоски за МИА
Тој вели дека нема фантоми во Избирачкиот список, туку дека има државјани што имаат наполнето 18 години и имаат живеалиште во Северна Македонија.
„Во државата има издадено нешто над два милиони и 400 илјади државјанства и тој е списокот. Значи бројката од над 1,8 гласачи е реална“,
вели Деркоски
Една од промените што треба да се направат во изборната регулатива, согласно препораките на ОБСЕ/ОДИХР, е структуирање поинаков концепт на ДИК. Лидерите на СДСМ и на ВМРО-ДПМНЕ, Зоран Заев и Христијан Мицкоски, уште на првата средба кон крајот на 2017 година се договорија ДИК да функционира како административно тело во кое партиите ќе делегираат свои набљудувачи само неколку месеци пред избори. Меѓутоа, ниту оваа новина не се реализира во изминатите повеќе од две години. Така, сегашниот состав на ДИК, кој првично беше избран времено и наменски – само за да го организира референдумот за името, во меѓувреме доби продолжување на мандатот. Овој состав на ДИК ги спроведе и претседателските избори минатата година, а сега се подготвува за новите вонредни парламентарни избори.