Комисијата за заразни болести и Советот за национална безбедност ќе се состанат за епидемиолошката состојба

Пред десетина дена министерот за здравство Венко Филипче најави дека доколку не се намали бројот на новозаразени и на хоспитализирани можни се нови рестрикции – продолжување на полицискиот час и скратување на работното време на угостителските објекти

Комисијата за заразни болести денеска треба да одржи состанок, на кој ќе се разгледува состојбата со коронавирусот, врз основа на што ќе одлучи дали ќе има дополнување на рестриктивните мерки за заштита од вирусот.

Пред десетина дена министерот за здравство Венко Филипче најави дека доколку не се намали бројот на новозаразени и на хоспитализирани можни се нови рестрикции – продолжување на полицискиот час и скратување на работното време на угостителските објекти.

Ако не се намали бројот на новозаразени, ќе се продолжи полицискиот час и ќе се скрати работата на кафеаните

Актуелната состојба со пандемијата ќе биде тема и на денешната седница на Советот за безбедност кај претседателот Стево Пендаровски. 

Оваа недела надлежните ја окарактеризираа како критична во однос на натамошното ширење на вирусот во третиот бран, во кој се регистрирани голем број заразени и починати. Бројот на активни случаи во државава изнесува 18 000. Во претходното деноноќие, беа регистрирани нови 303 случаи на коронавирусот од направени 1 405 тестирања, а починаа 41 лице.

(ОБНОВЕНО) Ковид-19: Починаа 41 пациент – најмладиот на 34 години, регистрирани и 303 новозаразени

Според најавите, од утре треба да стартува имунизацијата со 24 000 дози од вакцината на „Астра Зенека“ со граѓани над 75 години. Здравствените власти тврдат дека апсолутно нема контраиндикација за граѓани од која било возраст да се вакцинираат со оваа вакцина и порачуваат граѓаните да ги почитуваат мерките бидејќи, како што велат, ова е специфичен период.

В среда почнува вакцинација со „Астра Зенека“, ревакцина за три месеци

Во болниците изминатата недела посебно и викендот исто така огромен број пациенти побарале болничка заштита или им била индицирана после направените прегледи.

Од  денеска почнува да се користи капацитетот и на Центарот за рехабилитација во Капиштец каде веќе е поставен кислород на еден од катовите. Четириесетина кревети се оспособени да примаат пациенти, а инсталацијата ќе продолжи во следните денови додека не се постави кислород на сите 180 кревети.

Во болниците низ земјава хоспитализирани се 1 537 ковид-пациенти и има околу 330 празни болнички кревети. На инфективните оддели во Скопје се лекуваат 869 лица со ковид-19.