Се согласија за измените на Законот за служба во АРСМ, но не можат да се договорат за Законот за одбрана. СДСМ и ВМРО-ДПМНЕ продолжуваат со меѓусебни обвинувања кој го блокира носењето на овој закон, клучен за членството во НАТО. Проблем за партијата на Мицкоски е промената на името на Армијата, во Армија на Република Северна Македонија, но не е јасно зошто на собраниската седница пред три дена ВМРО-ДПМНЕ го поддржа Законот за служба во АРСМ, кој во првиот член предвидува промена на името.
Координаторот на пратеничката група на ВМРО-ДПМНЕ, Никола Мицевски, за „360 степени“ се обиде да објасни дека тие гласале „за“ Законот за служба во АРСМ бидејќи тој се однесува на унапредување на правата на граѓаните, во случајов, војниците и не може да се поистоветува со Законот за одбрана.
За него, ВМРО-ДПМНЕ тврди дека е идентичен со тој на власта, но во нивниот предлог го нема членот кој предвидува промена на името на Армијата.
Министерката за одбрана Радмила Шекеринска во неделното интервју за „Радио слободна Европа“ повтори дека ВМРО-ДПМНЕ е партијата која го блокира Законот за одбрана. Според неа, партијата на Мицкоски се труди државата да ја остави во сива зона во која под знак прашалник ќе бидат ставени безбедноста и сигурноста на граѓаните и членството во НАТО.
„Целта на законот не е да дефинира име на Армијата, тоа не е прашање што треба да го реши законот. Целта на Законот за одбрана е да ни даде законска можност ако ни треба НАТО за заштита на нашата безбедност да може да ја побараме и да ја добиеме таа заштита“,
изјави министерката за одбрана Радмила Шекеринска.
Во однос на Законот за служба во армијата, од СДСМ се пофалија дека со новините што ги вградиле во него се обезбедува подобра армија, подобри услови за работа во армијата и градење кадри по стандардите на НАТО.
„Со законските измени вработените во Армијата ќе добиваат месечен додаток во висина од 7.000 денари за решавање на станбеното прашање, стипендирање на дефицитарните кадри, можност за воено-медицинскиот персонал да работи во државното цивилно здравство, повисоки плати за сите цивилни лица во Армијата“,
изјави пратеникот од СДСМ , Хари Локвенец, на прес-конференција.
Од ВМРО-ДПМНЕ велат дека и ова решение на власта е за маркетиншки цели. Тие предложиле измените во делот на исплаќањето станарини на вработените во армијата да стапат во сила на 1 јануари 2021 година, но од СДСМ тоа го одбиле. За нив тоа претставува класичен изборен поткуп бидејќи измените на Законот стапуваат во сила во март оваа година.