Околу 85 отсто од 450 анкетирани компании низ земјава одговориле дека се подготвени да примат ученици на практична настава, посочи министерката за образование и наука, Мила Царовска промовирајќи ја кампањата „Учи паметно, работи стручно“ во Берово, каде што покрај од оваа општина присуствуваа градоначалниците и претставници на компании и училишта од Делчево, Пехчево и Македонска Каменица.
Министерката Мила Царовска по средбата изјави дека очекува од 2021/2022 да се отворат повеќе дуални паралелки, посочувајќи дека модуларното средно стручно дава можност за комбинирање неколку профили во една паралелка. Посочи и дека МОН и натаму ќе обезбедува стипендии за техничките науки за учениците да се стимулираат да се определат за стручното образование.
„Учениците добиваат феријална пракса со што одблизу се запознаваат со дејноста и струката која ја изучуваат, додека компаниите имаат можност да регрутираат кадар, по завршување на средното образование и со тоа да овозможат непречен развој на производството и усугите, а со тоа да придонесат и за намалување на невработеноста во земјата“,
истакна Царовска по средбата.
Во општината Берово има три стручни насоки – угостителско-туристичка, дрвопреработувачка и текстило-кожарска. Градоначалникот-домаќин на оваа средба Звонко Пекевски рече дека најголем интерес во изминатите години има за угостотелската струка, каде што се запишани 84 ученици во четири класови.
Тие се веќе на располагање на работодавачите во таа сфера, додаде градоначалникот, со што ќе се постигне и повисоко ниво на тузримот во општината.
Кампањата за предностите на средното стручно образование „Учи паметно, работи стручно“, која МОН ја почна овој месец, денеска беше промовирана и во Кочани, каде што присуствуваа претставници и од општина Виница.