Каков имот поседува доскорешниот потпретседател на РКЕ, кој во декемри, стана директор на енергетската компанија, и покрај укажувања од ДКСК дека тоа е спротивно на законите за спречување судир на интереси и за енергетика
Случајот со судир на интереси кај новиот директор на МЕПСО Куштрим Рамадани е една од точките на дневен ред на утрешното продолжение на 46. седница на Антикорупциската комисија.
Според информации од ДКСК, можно е да биде покрената прекршочна постапка против Рамадани откако тој дојде на чело на енергетската компанија, и покрај укажувањето од Антикорупциска дека неговото именување на нова функција би значело судир на интереси затоа што претходно бил член на Регулаторната комисија за енергетика (РКЕ).
Како што објави Телма кон крајот на минатата година, иако Владата побарала став од Антикорупциската комисија, која потврдила дека ќе има судир на интереси ако Рамадани, дотогашен потпретседател на РКЕ седне во првата фотелја на МЕПСО, сепак, на 1 декември, Надзорниот одбор на енергетската компанија го избрал токму овој кандидат за претседател на Управниот одбор и за генерален директор.
Мислење од Антикорупциска комисија, како што беше објавено, побарал лично премиерот Зоран Заев, на работна средба одржана на 23 октомври.
Во писмото од ДКСК до Владата е наведено дека има судир на интереси. Ако се назначи Рамадани за прв човек на МЕПСО ќе се прекршат законите за спречување судир на интереси и за енергетика. Рамадани не може да биде генерален директор на МЕПСО, две години откако ќе му заврши мандатот како член на РКЕ.
„Претседателот и членовите на РКЕ, во рок од две години по престанувањето на вршењето на јавните овластувања и должности, не можат да бидат именувани како членови на орган на управување на вршителите на регулирани енергетски дејности како и на вршителите на енергетски дејности на кои што им е наметната обврска за обезбедување на универзална, односно јавна услуга со оглед на надзорната функција која ја има РКЕ врз овие тела“,
стои во мислењето на Антикорупциска испратено до Владата.
Рамадани е кадар на ДУИ, а во имотниот лист што го доставил во Антикорупциската комисија навел дека поседува куќа од 300 квадратни метри во Куманово, земјиште во с. Опае и возила марка „мерцедес“ и „цитроен“…
Минатата седмица, во почетокот на 46. седница, ДКСК отвори неколку предмети за судир на интереси, кои се однесуваат и на актуелни министер и пратеници.