Поради новите мутации на коронавирусот, некои европски земји воведуваат контроли на границите. Дел од јавноста смета дека станува збор за кршење на Шенгенскиот договор и ограничување на слободата на движење, а Европската комисија не коментира и потсетува дека земјите членки се договориле како да спречат понатамошно ширење на вирусот
По Белгија, која воведуваше повремени и ненајавени контроли на своите граници, сега истото го направи и Германија, која воведе дополнителни контроли на границите со Австрија и Чешка, откако двете земји беа обележани со темноцрвена боја на ковид-мапата, што значи дека е регистриран голем број заразени со новите мутации на коронавирусот.
Со тоа, повторно е воспоставена границата на влезот од Чешка кон Германија, каде што се проверува секое возило.
„Границите не се затворени, воспоставивме строги гранични контроли. Важно е да продолжи протокот на товарниот сообраќај во сите насоки“,
вели баварскиот министер Јоаким Херман.
Баварскиот премиер Маркус Зедер, пак, вели дека мерката не е насочена кон граѓаните на Чешка, но е порака до властите дека посериозни мерки од другата страна на границата би претставувале значителна закана.
Но, и покрај ваквото тврдење, сепак, на крајот најмногу штета трпат граѓаните. Поради контролите, на границите се формираат огромни редици, при што се чека со часови.
Случајот со Белгија, а потоа и со Германија, како и најавите од други земји дека би можеле да го сторат истото, во јавноста се смета за кршење на Шенгенскиот договор и ограничување на слободата на движење.
Во Европската комисија, пак, не коментираат. Тие се повикуваат на познати пораки, искажани неколку пати – дека земјите членки се договориле како да се координира спречувањето на ширењето на вирусот.
„Очекуваме сите земји членки да го следат овој координиран пристап и организација на патувања врз основа на ковид-мапата. Иако земјите членки треба да влијаат на обесхрабрување на патувањето од и до зоните означени со темноцрвена боја, треба да се избегнува затворање на границите и забрани за патување“,
вели Кристијан Виганд, портпарол на Европската комисија.
Земјите членки неодамна ја прифатија иницијатива на Европската комисија за координиран пристап во контекст на патувањето, што воведе темноцрвени зони за областите каде што брзо се шират новите мутации на коронавирусот, властите да обесхрабруваат непотребни патувања и евентуално да бараат тестирање, самоизолација или карантин.
Во исто време, земјите членки се обврзаа да дозволат непречено патување за прекугранични работници и луѓе што живеат во пограничните области, како и да дозволат непречен и неограничен транспорт на стока.