Инспекторатот за животна средина и Техничкиот инспекторат побарале и добиле засега прелиминарни резултати од Управата за хидрометеоролошки работи, дека границите на концесијата за ископ на песок и чакал се во зоната на плавење на реката Пчиња. Продолжува прибирањето докази за преиспитување на концесијата
Случајот внимателно го следи и Владата, уверува вицепремиерот Љупчо Николовски, кој соопшти дека резултатите од секое следно испитување ќе се соопштуваат транспарентно, на терен
Границите на концесијата за ископ на песок и чакал во скопско Коњари се во зоната на плавење на реката Пчиња, покажале прелиминарните резултати од Управата за хидрометеоролошки работи (УХМР). Концесијата е анализирана на барање на Државниот инспекторат за животна средина и Техничкиот инспекторат, откако тие истото го утврдиле првично на терен во јануари годинава.
„Со дописот е побарано да се изврши проверка на усогласеноста со одредбата од Договорот за концесија со која се забранува експлоатацијата на минерална суровина да се врши во крајбрежниот појас во широчина од 50 метри зад линијата на допирање на педесетгодишната вода. УХМР достави прелиминарни податоци за положбата на котата на педесетгодиишните води, која навлегува длабоко во концесиското поле. За да имаат правна важност, овие податоци ќе треба да се потврдат со дополнителни мерења и вештачења, кои што ќе се реализираат во натамошната инспекциска постапка, но не очекуваме да има разлики помеѓу овој прелиминарен наод и натамошните подетални истражувања“,
вели директорката на Државниот инспекторат за животна средина, Ана Петровска.
Утврдена е недоследност и при доделувањето на Дозволата за експлоатација во 2019 година. Дадена е според Правилник за формата и содржината на Елаборати од 2009 година, иако нов таков документ е донесен во 2014.
„Во меѓувреме, ќе го известиме Министерството за економија и Министерството за животна средина и просторно планирање за индициите околу прекршувањето на Законот за води. Исто така, имајќи предвид дека Елаборатот за заштита на животната средина за Блок Б од концесиското поле не е усогласен со важечкиот Правилник и истиот не содржи Програма за заштита на животната средина со конкретни мерки, ќе побараме да се изработи нов Елаборат. Додека да се изработи и одобри Елаборатот, ќе побараме од Државната техничка инспекција да наложи прекин на работите на Блокот Б“,
кажа Петровска и појасни дека врз основа на прибраните докази, натаму Министерството за економија е надлежно да предложи на Владата да го раскине Договорот за концесија.
Случајот го следи и Министерството за животна средина. Ресорниот министе,р Насер Нуредини, уверува дека согласно финалните наоди чие комплетирање се очекува, Владата ќе ги преземе и потребните мерки за разрешување на случајот.
„Работиме заедно со Државниот инспекторат за животна средина на начините со кои ќе можеме соодветно да ја провериме и адресираме состојбата со водите на лице место преку инспекторите за животна средина, а соработуваме и со Техничката инспекција, која е надлежно тело за овие концесии. Оваа координирана активност помеѓу Министерствата и Инспекторатите, како и релевантните стручни лица и управи, е добар пример како треба да се работи на сите прашања во земјата, доколку сакаме да се имплементираат потребните еколошки стандарди“,
изјави Нуредни.
По прочистувањето на судството и борбата со организираниот криминал и корупцијата, заштитата на животната средина е трет врвен приоритет на Владата, кажа вицепремиерот Љупчо Николовски.
„Активностите на Инспекторатот нема да застанат тука, следат неколку фази за што, при некоја фаза, при секое испитување, вештачење, вака јавно, транспарентно на терен, заедно ќе ги соопштиме. Нема што да се крие за ниту еден случај во државата, така да, ако сакаме да одработиме чесно и одговорно ова е начинот и ова е пристапот. Законите мора да се почитуваат, никој не смее да се поставува над законот. Мора да има ред и дисциплина особено кога се работи за нешто што влијае врз загрозување на животната средина и крајно врз безбедноста и здравјето на сите луѓе“,
изјави Николовски.
Случајот на површински ископ на песок и чакал меѓу селата Долно и Средно Коњари во општина Петровец е во фокусот на медиумите, особено поради сплотеноста на жителите кои се противат на тоа. Тие со години испраќаат дописи до надлежните институции и масовно протестираат со барање да се укине концесијата, оти стравуваат од поплави и загадување на подземните води. Бараа власта на највисоко ниво да се вклучи во одбрана на природните ресурси.
Концесијата ја има фирмата „Еуро прогрес”, чиј управител, Ќазим Османовиќ, по секое обвинување на жителите тврдеше дека во денешно време ниту дете не може да поткупите да молчи ако се работи незаконски, и најави дека ќе бара институционална заштита од соселаните. Но, соселаните не му се плашат. Овде се организираа протести и во екот на пандемијата.
Директорката на Државниот инспекторат за животна средина, Ана Петровска, уште во декември ненајавено влезе на локацијата каде се врши ископот и на самото место констатира дека загриженоста на локалните жители е оправдана и посочи низа нерегуларности во работењето на концесионерот.