Кризниот штаб соопшти дека и натаму е забрането организирање на прослави за новогодишната ноќ, бидејќи евентуални олеснувања може да доведат до нов бран на 15-20 јануари, полош од овој сега
Владата на Србија на вчерашната седница донесе нови мерки во борбата против коронавирусот, кои се однесуваат на овој викенд, со кои е овозможено трговските и угостителските објекти да работат до 20 часот, со зголемена контрола на усогласеноста со епидемиолошките мерки.
Оваа мерка се однесува и на услужните активности – фризери, салони за убавина, спортски сали.
Новите мерки се однесуваат и на затворени трговски центри и слични објекти во кои се врши дејноста трговија на мало, а чија површина е поголема од 300 квадратни метри. На тој простор, максималниот број посетители е ограничен на еден посетител на девет квадратни метри.
Чуварите ќе бидат обврзани да го контролираат почитувањето на епидемиолошките мерки во објектите – носење маски, одржување на физичко растојание и број на дозволени посетители.
На терен ќе бидат ангажирани зголемен број санитарни инспектори, кои ќе го контролираат почитувањето на мерките во објектите и хотелите, особено на Копаоник и Златибор.
Епидемиологот Предраг Кон за РТС, по повод воведувањето на нови мерки, изјави дека медицинскиот дел од Кризниот штаб не се согласил со овој компромис.
Кризниот штаб соопшти дека и натаму е забрането организирање на прослави за новогодишната ноќ, бидејќи евентуални олеснувања може да доведат до нов бран на 15-20 јануари, полош од овој сега.
„Податоците покажуваат дека пред нас се уште има многу сериозна, тешка епидемиолошка состојба. Особено тешко во големите болници, клинички центри кои се преморени и работат во многу тешки услови”,
нагласи членот на Кризниот штаб Бранислав Тиодоровиќ, на прес -конференција.
Во меѓувреме, во Србија продолжува вакцинацијата. Вчера вакцини примиле жителите на геронтолошкиот центар во Крагуевац и Ниш, а од вчера почна и вакцинацијата на граѓаните во српските заедници во Косово.
Откако српската премиерка Ана Брнабиќ меѓу првите се вакцинира со вакцината на „Фајзер“, претседателот Александар Вучиќ изјави и тој ќе се вакцинира, но со друга што ќе ја одобри Агенцијата за лекови, додека претседателот на српскиот парламент со трета, сè со цел да покаже дека сите вакцини се добри.
Мерки што веќе се на сила
Според претходната одлука на Владата во Србија, објектите и институциите од областа на културата можат да работат секој ден до 21 часот.
Во согласност со претходно донесените мерки, на угостителските објекти им е дозволено нон стоп да вршат активности за доставување храна, 24 часа на ден, седум дена во неделата, како и други бизнисмени чија основна дејност е тоа.
Исто така, аптеките и бензинските пумпи (активност за продажба на гориво) можат да работат нон-стоп, секој ден без ограничувања.
Продавници за храна, продавници, малопродажни објекти, како и весници, киосци и слично, каде што, по правило, не се влегува во објектот кога се купува, можат да бидат отворени во работните денови и викендите до 21 часот.