Матичните лекари се разочарани зашто здравствените власти ги изоставиле од финансиската поддршка иако примарното здравство го понесе најголемиот товар, реагира докторката Лилија Чолакова-Дервишова од Велес, која е претседателка на Здружението на приватни лекари на Македонија.
Според Чолакова-Дервишова, секаде во соседните држави здравствените власти им дале финансиска поддршка и на лекарите и медицинските сестри од примарното здравство, но тоа не е случај и кај нас.
„Игнорантскиот однос не е добар, зашто бројката на вработени во примарно здравство, кое е столбот на целокупниот здравствен систем, е огромна. Сметаме дека во време на пандемија на ковид-19 дадовме и даваме максимална поддршка, работиме со ковид-пациенти, се повикуваат на контрола се закажуваат прегледи, врската и менаџирањето беа преку примарниот доктор, анкетирањето и алгоритмите за тестирање беа преку матичниот доктор, како и закажување за тестирање. Така што целокупното менаџирање и тријажирање во пандемијата на ковид-19 паѓа на товар на примарно здравството. Не смее никој да каже дека матичните доктори не работеле и не дале поддршка со ковид-пациентите. Напротив, најголемиот број пациенти коишто се третирани и излекувани паднаа на грбот на матичните доктори и затоа не е во ред да не бидат наградени“,
потенцира д-р Чолакова-Дервишова.
Таа посочува дека матичните лекари работат и на испраќање пациенти на комисии, скенирање документи, закажувања, продолжување на нега и боледувања. Огромна е, смета, обврската и работата на секој матичен лекар во вакви услови.