Контејнерите со материјали за модуларната болница за пациенти позитивни или со симптоми на ковид-19 во Струга треба да пристигнат денеска, а викендов ќе почне да се монтира, информира директорот на Општата болница Струга, Мухамед Асани.
Теренот за поставување на монтажната болница, според него, е подготвен. Поставени се инсталации за приклучоци на вода, струја и канализација.
„Објектот ќе се протега на површина од 600 квадратни метри. Предвидени се 35 кревети со цела опрема за пациенти позитивни или суспектни на ковид-19, како и лабораторија“,
изјави Асани.
Во моментот, како што информира директорот, во двата ковид-центри во струшката болница, односно во Интерното и во Детското одделение, хоспитализирани се 40-ина пациенти, од кои најголемиот дел се на кислородна поддршка. Според него, состојбата со коронавирусот во Струга и Струшко е стабилна и бројот на пациенти стагнира.