Ќе имаме средба со угостителите и ќе разговараме за дополнителна помош од државата за да ги намалиме последиците од ковид-19, рече денеска министерот за економија Крешник Бектеши откако Независната угостителска комора најави дека новите ограничувања на работното време за угостителскиот сектор ќе ги оспорат пред Уставниот суд.
Бектеши вели дека дополнителна помош ќе има во првиот квартал од 2021 година. Одговарајќи на новинарско прашање, тој рече дека угостителите се едни од оние што добиле најмногу помош за надминување на кризата.
„Ние редовно и во склоп со координативното тело кое е формирано од страна на Министерството за економија разговараме за мерки. Секако дека ќе имаме средба со угостителите во наредниот период, убеден сум дека ќе најдеме решение за дополнително да ги помагаме во првиот квартал од наредната година, но треба да се има предвид дека угостителскиот сектор бил еден од најпомогнатите сектори и во 2020 година. Паралелно со рестриктивните мерки ние носиме и мерки за помош и така ќе продолжиме“,
рече Бектеши.
Министерот рече дека засега не се размислува за промена на одлуката за кратење на работното време, сѐ додека со таква препорака не излезе Комисијата за заразни болести.
„Во моментот не се размислува за друго решение, тоа е предлог на Комисијата за заразни болести. Веруваме во нивниот капацитет, но мора да кажеме дека ние нема да ги изоставиме угостителите и ќе им излеземе во пресрет“,
вели Бектеши.
Независната угостителска комора, пак, најави дека ќе поднесе иницијатива до Уставниот суд за новата мерка со која им се ограничува работното време до 18 часот.
„Со оглед дека ниту премиерот ниту некој друг член на Владата не излегоа во пресрет на нашето барање за итна јавна средба отворена за јавноста и за учество на медиумите, очигледно Владата си поигрува и ја потценува моќта и општествената улога и влијанието на угостителите и угостителските работници кои секојдневно опслужуваат повеќе од половина милион гости во угостителските објекти ширум земјава“,
порача претседателот на НУК, Здравко Јосифовски.