Новоизбраниот претседател на САД Џозеф Бајден и потпретседателката Камала Харис ќе стапат на должност на 20 јануари, а функцијата ќе ја преземат со заклетвата на скалите пред Капитол. Но, поради специфичните услови во светот поради пандемијата, церемонијата на инаугурацијата главно ќе биде виртуелна, објави организацискиот комитет.
Организацискиот одбор за инаугурацијата на идниот американски претседател предупреди дека ќе има сосема ограничен број на присутни на церемонијата и на традиционалната парада што следи потоа.
„На 20 јануари новоизбраниот претседател Бајден и потпретседателката Харис ќе дојдат на Капитол Хил на историска церемонија под многу строги безбедносни и здравствени мерки, Бројот на учесници на церемонијата ќе биде крајно ограничен, а и она што следува по церемонијата ќе се смени“,
се вели во соопштението на Претседателскиот комитет за инаугурација (ПИК), кој ги повикува граѓаните да не доаѓаат во Вашингтон бидејќи церемонијата главно ќе бидат виртуелна.
Заклетвата се одржува традиционално на скалите на зградата на Конгресот, пред тревникот на Националниот парк. Оваа церемонија секогаш привлекува стотици илјади луѓе кои доаѓаат во американскиот главен град да бидат сведоци на овој настан.
Инаугурацијата оваа година ќе се одржи во сенка на епидемијата на коронавирус, во услови кога бројката на починати како последица на коронавирусот во САД е 300 000 луѓе, со секојдневен рекорд на новозаразени.
Од ПИК посочуваат дека работат на почитување и обновување на сеќавањето на светите американски традиции по повод инаугурацијата, истовремено обезбедувајќи ја безбедноста на Американците и спречувајќи ширење на ковид-19.
Претселателот во заминување Доналд Трамп досега не потврди дека ќе го прими неговиот наследник Бајден во протоколарна посета на Белата куќа како дел од трансферот на власта.