Најновите податоци од Државната изборна комисија (ДИК) за двете општини каде денеска се одржуваат предвремените избори за градоначалници, покажуваат дека до 15:00 часот во Штип излезноста изнесува 23,03 отсто, а во Пласница 33,47 проценти.
Бројките упатуваат на тоа дека во Пласница е достигнат потребниот праг за да бидат успешни изборите – да гласаат една третина од запишаните во Избирачкиот список.
Од вкупниот број на гласачи во оваа општина – 4 954, досега правото на глас досега го оствариле 1 658 жители или 33,47 проценти.
Во Штип, потребната излезност сè уште не е достигната, но во последните два часа одзивот од 16,61 отсто (до 13 часот) скокна на 23,03 проценти (до 15 часот).
Право на глас имаат 41 777 штипјани, а досега тоа го оствариле 9 620. За да се достигне една третина до затворањето на избирачките места во 19:00 часот треба да излезат вкупно 13 926 или уште 4 306 гласачи.
Доколку не се постигне прагот, тогаш изборите пропаѓаат и целата постапка се повторува.
„Доколку во првиот круг од гласањето за избор на градоначалник на општината, односно градоначалник на градот Скопје не излезат една третина од вкупниот број на избирачи запишани во изводот од Избирачкиот список за соодветната општина, односно градот Скопје, се повторува целата изборна постапка за соодветната општина“,
пишува во ставот 2, член 132 од Изборниот законик.