Опозициската партија бара оставка од премиерот, за да се формира „влада за национален спас“
ВМРО-ДПМНЕ се јави со барање оставка, регирајќи на вечерашното интервју на премиерот Зоран Заев, во кое тој говореше за последниот развој на односите со Бугарија, кој создаде нова неизвесност околу почетокот на преговорите на нашата земја со ЕУ.
Во реакцијата на гостувањето на Заев на ТВ 21, опозицијата го нарекува премиерот измамник, кој, како што се наведува, уште пред четири години лажел дека земјава ќе ги почне преговорите и тврдел дека договорот со Бугарија е “голем исчекор“, кој сега се покажал како „камен на сопнување“.
„Ветувањето на измамникот Заев за ЕУ е готово. Овој човек носи само криминал и стагнација. Може сега Заев да смислува изговори за неговиот неуспех и неспособност до бескрај, но неговата неспособност и лажни ветувања ги плаќаат граѓаните. Заев ветуваше дека ќе почнеме датум за преговори уште пред четири години, дури и излажа дека сме добиле датум за преговори. Заев ветуваше дека ќе имаме бесплатно здравство како во Европската Унија. Дека откако ќе го смениме името веднаш ќе влеземе во Унијата“.
се наведува во соопштение на ВМРО-ДПМНЕ.
Заев, велат од опозициската партија, ветуваше и дека ќе градиме патишта бидејќи ќе влеземе во ЕУ, дека невработеноста ќе се намали а платите ќе се зголемат.
„Четири години потроши од нашите животи, а видовме само криминал, корупција и многу лаги. Неговата политика не носи резултати. Тоа е очигледно. Нема ниту еден проект кој граѓаните ќе го паметат, а Заев го изгради. Но затоа ќе го паметат по аферите и лагите. Излажа дека договорот со Бугарија е голем исчекор. Се покажа дека е камен на сопнување. Заев не затвори ниту едно прашање во корист на државата, туку единствено ги измами граѓаните. Оставка на Заев и влада за национален спас. Заев е минато“,
нагласуваат од ВМРО-ДПМНЕ.