Расправата за измените на Изборниот законик ќе се одржи надвор од Собранието, а датумот и местото дополнително ќе бидат соопштени, соопшти денеска координаторот на пратеничката група на СДСМ, Јован Митревски.
Тој го потврди она што го кажа и претседателот на Собранието, Талат Џафери, дека јавна расправа по дефиниција на Деловникот сега не може да се одржи бидејќи предлог-законите се носат по скратена постапка.
„Со оглед на тоа што веќе е закажана Комисијата за разгледување на законите, до кога е и рокот за поднесување амандмани, а логиката на јавната расправа е да се сумираат мислењата и да се добијат насоки за доставување амандмани, во оваа насока нема деловничка можност за одржување јавна расправа по дефиниција од Деловникот во Собранието“, рече Митревски.
Сепак, тој беше дециден дека јавна расправа ќе има, но датумот и часот на одржувањето ќе ги претседателот на Комисијата за политички систем и односи меѓу заедниците, Александар Кирацовски.
Најверојатно тоа ќе биде надвор од собраниската зграда и ќе бидат поканети многу експерти од оваа област, рече Митревски.
Кирацовски во петокот најави дека јавната расправа ќе биде в среда во 14 часот, но не ја кажа локацијата.
Седницата на собраниската Комисија за политички систем и односи меѓу заедниците на која минатата недела требаше да почне амандманската расправа за предлог-измените на Изборниот законик се одложи бидејќи не се преведени сите амандмани.
ВМРО-ДПМНЕ и ДУИ поднесоа 5.899 и ќе се чека службите до крајот на оваа недела да ја завршат работата по што треба да започне амандманскиот маратон за двата предлог-закона – за една изборна единица и за отворени листи и родова рамноправност.
„Деловникот не познава терминологија јавна расправа. Во Деловникот се уредува јавна дискусија. По разгледувањето во прво читање или по претресот по првото читање, Собранието по потребата може да донесе одлука за јавна дискусија по определен закон ако е од поширок општ интерес. Откако пленумот ќе донесе одлука за јавна дискусија, определува матично работно тело кое ќе го организира и ќе ја одржи дискусијата. Со член 146 и другите членови потоа се пропишува како тоа се спроведува“, објасни Џафери по најавата од Кирацовски за јавна дискусија по предложените измени.