Претходното законско решение кое крена голема прашина во јавноста поради спорниот член со кој се промовираше амнестија за градењето на диво, го помина собранискиот филтер, но не беше потпишано од страна на претседателот Стево Пендаровски. Бочварски тврди новата верзија на законското решение е испратена во Собранието без спорната одредба
Во новиот предлог-закон за легализација на дивоградби го нема членот кој предвидуваше да се стопираат сите граѓански и кривични постапки што се во тек и произлегуваат од постапки за отстранување објекти и постапки во врска со изградба на бесправни објекти. Ова, во гостувањето во емисијата „360 степени“, го изјави министерот за транспорт и врски, Благоја Бочварски, споредувајќи го новиот закон со претходниот, кој го помина собранискиот филтер, но претседателот Стево Пендаровски одби да го потпише.
„Таа одредба беше додадена како амандман и не беше предлог на Владата. Денешниот закон не вклучува таква одредба и законот го пуштаме во собраниска процедура без таа одредба“,
рече Бочварски.
Тој објасни дека со новото законско решение ќе се легализираат дивоградби изградени до 1 јануари 2021 година, а рокот за поднесување на барањето за легализација ќе биде шест месеци од денот на влегувањето во сила на законот. Сите објекти што не ги опфаќа овој закон ќе треба да се рушат.
Кога станува збор за заштитени подрачја, Бочварски посочи дека ќе биде дозволена легализација на објекти само во зоните за одржливо користење, а со претходна согласност од Министерството за животна средина.
„Тоа се одредени села и населени места во подножјата на планините на овие зони каде живеат луѓе и функционира системот и не е спорно. Националните паркови се исфрлени од овој закон, но и тие се поделени на четири зони. Ако е во зона којашто е во строга заштита нема да може да биде процесуирано како предмет, ако е во зона за одржливо користење ќе треба прво да се добие согласност од Министерството за животна средина“,
рече тој.
Според новото законско решение, за едно лице да може да побара легализација на дивоградбата ќе мора да докаже дека таа е изградена пред 1.1.2021 година со прикажување на сметки од платени комунални услуги, а не како што беше досега само со изјава заверена на нотар. Тоа, според Бочварски, дава гаранција дека законот нема да може да се злоупотребува.
Министерот не се согласува со критиките во јавноста дека со законското решение се промовира неправото.
„Овој закон треба да реши прашања на веќе постоечки бесправни објекти кои не ги третира законот за градење. Јас веќе кажав дека ние може и да не го носиме овој закон, но има примери, како Техничкиот факултет во Битола, којшто неодамна беше легализиран, граден по сите стандарди и одобрениеја во поранешна Југославија, но при формирање на Агенцијата за недвижности не е впишан во катастар. Факултетот не можеше да направи реконструкција на кров, на прозори…Такви објекти има во државата стотици. Има објекти кои се градени по сите закони и го чекале претходниот закон, а и се уште има такви објекти“,
посочи министерот.
На прашањето дали граѓаните кои досега граделе законски може да ја тужат државата, бидејќи ги става во нерамноправна позиција со оние кои граделе без никаква контрола, Бочварски вели:
„Денешниот закон кој ќе оди во Собрание не ги става во рамноправна ситуација оние кои граделе бесправно со оние кои граделе законски, бидејќи тие што бесправно граделе со овој закон се казнуваат со плаќање на дополнителни пенали и со тоа ги ставаме во позиција да бидат казнети со 50 насто повисоки комуналии од редовните или 100 насто доколку се работи за објект поголем од 80 квадрати. Со тоа ги ставаме во заштита оние што граделе согласно Законот за градење и, секако, дека на овој начин сакаме да ги одвратиме понатамошните намери луѓето да градат бесправно, бидејќи ќе платат поголеми комуналии“,
порача Бочварски.