Предлог-законот, со кој требаше да се воведат дигитални учебници во основното образование, Владата го повлекла од собраниска процедура за да ги слушне забелешките на здруженијата и граѓанските организации кои не успеале да се произнесат и да дадат свое мислење за реформата. За „360 степени“ од Владата велат дека законот за учебници повторно ќе биде достапен за јавна дискусија, а потоа вратен во Собранието.
„Предлогот-законот за учебници и други наставни и дидактички материјали во основното и средното образование ќе биде повторно достапен за јавна дискусија и за вклучување на оние поединци, групи и здруженија на граѓани кои не успеаја досега да се произнесат и да дадат свој предлог и или сугестија за усвојување на најдобрата верзија во интерес на поквалитетен воспитно – образовен процес, по што конечниот текст на законот, кој ќе се креира по целосно исцрпување на придобивките од јавната дебата, ќе биде доставен во Собрание“
велат од Владата.
Од Владата потенцираат и дека Министерството за образование и наука сепак ќе продолжи со имплементирање на планот за реформа на основното образование, согласно кој, предвидените новини се воведуваат етапно со почетокот на новата учебна година, во прво и четврто одделение.
„Новите наставни програми за прво и четврто одделение се веќе усвоени и јавно достапни, со што сите дезинформации и шпекулации врзани за нивната содржина, а креирани од одредени центри, најчесто од сферата на политиката, беа целосно демантирани, исто како и лажните вести врзани за Концепцијата. Во меѓувреме, врз основа на новите наставни програми се изработуваат и нови материјали за учење, при што оние за прво одделение ќе бидат готови до крајот на јули по што ќе следи дистрибуција до училиштата., додека за четврто одделение ќе бидат готови во првата половина на август и тие ќе добијат и дигитална верзија“,
додаваат од Владата.
Од Министерството за образование, пак, не ги коментираат причините за повлекување на законот за учебници, туку нагласуваат дека сите подготовки за новата Концепција во образованието течат согласно утврдената динамика.
„Наставните програмите се веќе донесени. Во постапка е набавката на 10 илјади таблети. Тече подготовката на материјалите за учење за прво одделение кои треба да се готови до крајот на јули, а првата половина на август првите дигитални учебници треба да бидат сосема готови и да се дистрибуираат до училиштата“,
соопшти МОН.
По повлекувањето на законот од Собрание, опозициската ВМРО-ДПМНЕ денеска побара оставка од министерката Мила Царовска и најави дека нејзината пратеничка група ќе ги искористи сите можности да не се донесе законот за учебници.
„Како пратеничка група, и покрај повлекувањето на законот, будно ќе ја следиме ситуацијата бидејќи свесни сме дека СДСМ и Мила Царовска можеби повторно тактизираат само за да се повлече иницијативата за референдум која беше покрената од граѓански иницијативи и повторно да го вратат овој закон во Собрание со злоупотреба на европското знаменце“,
изјави Благица Ласовска од ВМРО-ДПМНЕ.
Информацијата за повлекување на законот од собраниска процедура ја објави граѓанската иницијатива „Учебници и настава мора да има“ од каде што почнаа со собирање потписи за референдум преку кој бараа повлекување на законот. Вчера на својата фејсбук-страница објавија допис од спикерот Талат Џафери, кој ги информирал дека Владата го повлекла законот.
Од Иницијативата против дигиталните учебници одржаа неколку протести во Скопје и другите градови, а некои од учениците ја бојкотираа и наставата во знак на револт. Дел од родителите во мај до Собранието доставија и иницијатива за собирање потписи за референдум, откако средбата со претставници на МОН заврши без договор за повлекување на законот за учебници.